प्रहरीलाई घूस खुवाउन भन्दै ठग्ने पक्राउ

राजविराज: प्रहरीलाई घूस खुवाउन भन्दै ठगी गर्ने एक महिलालाई सप्तरी प्रहरीले पक्राउ गरेको छ । सेवाग्राहीसँग ठगी गरेको आरोपमा जिल्ला प्रहरी कार्यालयले सप्तरीको शम्भुनाथ-१ खोक्सर प्रबाहकी ३० वर्षीया ललितादेवी साहलाई पक्राउ गरेको हो ।

शम्भुनाथ नपा १० की रञ्जिताकुमारी मण्डलको बेल्ही चपेना गाविस ४ का दीपेन्द्र मण्डलसँग प्रेम सम्बन्ध भई घरपरिवारको सल्लाहमा विवाह गर्ने सहमति भएको थियो । सहमतिअनुरूप रञ्जिताको परिवारले उनकै घरमा डेरा गरी बस्ने दीपेन्द्रको पढाइ खर्चका लागि पाँच लाख रुपैयाँ दिएको रञ्जिताले बताइन् ।

दाइजो स्वरूप पैसा लिएर पनि दीपेन्द्रको विवाह अन्तै भएपछि रञ्जिताको परिवारले उनीसँग आफूहरूले दिएको रकम फिर्ता मागे ।रकम फिर्ता नपाएपछि रञ्जिता उजुरी गर्न जिल्ला प्रहरी कार्यालय पुगिन् । त्यही क्रममा उनको भेट ललितासँग भयो । त्यसपछि उनीहरूबीच गाउँमै पनि बारम्बार भेट हुन थाल्यो ।

प्रहरीले घटनाबारे अनुसन्धान गरिरहेका बेला भेट भएकी ललिताले प्रहरीमा आफ्नो चिनजान भएको भन्दै रवाफ देखाइन् । उनले पैसा फिर्ता गराई दिने आश्वासन दिँदै त्यसका लागि प्रहरीलाई घूस खुवाउनु पर्ने विश्वास दिलाइन् । पाँच लाख रकम फिर्ता पाउने आसमा रञ्जिताले पटकपटक गरी ललितालाई ३४ हजार पाँच सय रुपैयाँ दिइन् तर ललिताको आश्वासन झुटो थियो ।

जिल्ला प्रहरी कार्यालय धाएबापत दैनिक आतेजाते खर्च पाँच सय र प्रहरीलाई दिनुपर्ने भन्दै पटकपटक गरेर रञ्जितासँग उनले ३४ हजार पाँच सय रुपैयाँ लिएको प्रहरी नायब उपरीक्षक दानबहादुर कार्कीले बताए ।केही दिनसम्म ललिताले प्रहरीलाई पैसा दिएको, काम हुन्छ भनेर झुक्याई रहिन् । यसबारे थाहा पाएपछि अधिकारकर्मीले प्रहरी उपरीक्षक दिवेश लोहनीसँग गुनासो गरेपछि ललितालाई झिकाएर सोधपुछ गरियो । उनले भनेका प्रहरीलाई उभ्याएर सोधपुछ गर्दा ललिताले प्रहरीलाई पैसा नदिएको स्वीकारिन् । उनले पैसा फिर्ता गराउन पहल गरे पनि कसैलाई पैसा नदिएको भन्दै आफूले लिएको सम्पूर्ण पैसा फिर्ता गर्ने भनेपछि प्रहरीले उनलाई नियन्त्रणमा लिएको हो ।

प्रहरीले ललिताविरुद्ध ठगी मुद्दा दर्ता गरी आवश्यक अनुसन्धान गरिरहेको जनाएको छ । दलालबाट सावधान भन्दै ४८ वटै प्रहरी इकाईमा चेतनामूलक सूचना बोर्ड राखेको सप्तरी प्रहरीले कसैले प्रहरीका नाममा ठगी गरेमा तत्काल सूचना दिन अनुरोधसमेत गरेको छ ।