राजदूत विवाद
राजदूत नियुक्ति प्रकरणलाई लिएर अहिले उत्पन्न विवादले यसपटकलाई सम्भवतः सुखद् वि श्राम पाउनेछ, सरकारले दुई विवादित व्यक्तिहरूको नाम अगाडि नबढाउने निर्णय गरेपछि ।
‘म्यान पावर' एजेन्सीमा लाग्नु आफैंमा अयोग्यता हैन उक्त पदको लागि, तर जुन मुलुकमा उनीहरूको नियुक्ति प्रस्तावित गरिएको थियो, त्यो मुलुकमै व्यापारिक हित संलग्न रहनुले उनीहरूलाई विवादमा तानेको थियो मुख्य रूपमा । अर्को उनीहरूविरुद्ध प्रत्यक्ष या परोक्ष रूपमा ठगीको आरोप लाग्नुले भोलि राजदूत नियुक्त भएर गएपछि मुलुकको प्रतिनिधि विभिन्न आलोचना र दुरुपयोगको पात्र बन्न सक्ने खतरा बढ्न सक्ने सम्भावना पनि त्यत्तिकै थियो ।
राजदूत पदमा प्रस्तावित आशा लामा र शर्मिला पराजुली ढकालको नियुक्तिलाई समयमै रद्द गर्न तयार भएर सरकार तथा सम्बन्धित या सिफारिसकर्ता दल र तिनका नेतृत्वले पनि सार्वजनिक आक्रोश तथा आलोचनालाई सकारात्मक रूपमा लिएर ढिलै भए पनि जवाफदेही संस्कृति तथा चरित्र प्रदर्शन गर्न थालेको प्रमाण दिएका छन् ।
भोलि मुलुकको विद्यमान राजनीतिक अवस्था तथा संविधानको अपूर्णता, सधैं शान्ति प्रक्रियालाई तार्किक निष्कर्षमा पुर्याउन नसकेकोमा पनि यसरी नै समीक्षा, लोकसम्मतिप्रतिको सम्मान र विवेक प्रयोग गरेमा राजनीति सहज अवतरणतर्फ लाग्ने विश्वास गर्न सकिन्छ ।
राजदूत नियुक्तिको प्रसंगमा दलीय भागबन्डाले निर्णायक भूमिका खेलेको पहिलोपल्ट हैन यो । तर किन रद्द भयो दुई नियुक्ति ? संयोगले यो निर्णयबाट प्रभावित दुवै व्यक्ति महिला परेका छन् । के महिला भएर मात्रै उनीहरूको नियुक्ति रद्द भएको हो त ? पक्कै पनि हैन । किनकि महिला सशक्तीकरण र मुलुकलाई अन्तर्राष्ट्रिय जगत्मा प्रतिनिधित्व गर्न महिलाको उपस्थिति अनिवार्यरूपमा बाञ्छित हुँदाहुँदै पनि न्यूनतम पात्रता नहेरिँदा त्यो प्रत्युत्पादक बन्न जान्छ ।
त्यसले मुलुकमा अर्को मनोवैज्ञानिक सन्देश जान सक्छ । अहिले महिलाको नेतृत्वमा रहेको सर्वोच्च अदालत र व्यवस्थापिका-संसद् अपेक्षित संवैधानिक दायराबाट विचलित हुँदा या हुन लाग्दा यदि महिलाबाट मुख्यरूपमा खबरदारी भएन भने भोलि ‘लैंगिक समानता' मा आएका उपलब्धि विकृत र नियतपूर्ण आलोचनाको सिकार बन्न सक्छ ।
राजनीतिक दलहरूको नेतृत्वमा आलोचनाप्रति बाध्यात्मक परिस्थितिकै भए पनि जवाफदेहीको संस्कार उत्पन्न हुनु ‘लोकतन्त्र' को लागि शुभसंकेत हो । कमसेकम त्यो अवसर जुराएकोमा आशा लामा र शर्मिला पराजुलीलाई धन्यवादका पात्र मानिनुपर्छ ।