काबुलः अफगानिस्तानका राष्ट्रपति मोहम्मद असरफ घानीले आफ्नो देश एक स्वतन्त्र राष्ट्र भएको र अरू कुनै राष्ट्रको विरुद्ध प्रयोग नहुने बताएका छन् ।
काबुल सैनिक विमानस्थलमा राष्ट्रिय सुरक्षा तथा प्रतिरक्षा बलद्वारा सोमबार आयोजित राष्ट्रिय दिवस समारोहलाई सम्बोधन गर्दै घानीले भने, ‘हाम्रो देश एक स्वतन्त्र राष्ट्र थियो, छ र सदाका लागि स्वतन्त्र नै रहने छ । यो विश्वका अन्य कुनै देशका लागि खतराका रूपमा कदापि रहँदैन ।' उनको भनाइ पाकिस्तानप्रति पनि लक्षित थियो ।
अफगानिस्तान सधैँभरी मार काट, हिंसा, हत्या, युद्ध, विष्फोट, विद्रोहै विद्रोहले आक्रान्त मुलुक हो । राजालाई विद्रोह गरी हटाइएपछि अफगानिस्तानले हत्या हिंसा र युद्ध व्यहोर्न बाध्य भएको छ । एक नयाँ उत्साह र अठोटका साथ राष्ट्रपति घानीले अफगानिस्तानमा शान्ति कायम गर्न ताहेको बताए । उनले भने, ‘विदेशी हस्तक्षेप र चलखेलले नै यो राष्ट्रमा सशस्त्र विद्रोह र अशान्ति निम्त्याएको हो । जसले अफगानिस्तानलाई युद्धभूमिमा परिणत गर्ने सपना देख्छन्, अब तिनीहरूले आ-आफ्नो चिहान पुग्ने सपना देखे हुन्छ । यस्तालाई हाम्रो अग्रिम समवेदना छ ।'
मुलुकको उत्तरी कुन्दुज प्रान्तको मौलावी सलामलाई तालिवान लडाकुहरूले लामो समयसम्म कब्जामा लिई छायाँ सरकार समेत चलाएका थिए । हालसालै मात्र अफगान राष्ट्रिय सेनाले तालिवान विद्रोहीलाई परास्त गरी त्यहाँ सरकारको बलियो उपस्थिति देखाउन सेना सफल भएको छ । सेनाको आक्रमणपछि त्यहाँ विद्रोहीले टाउको उठाउने हिम्मत गर्न नसकेको घानीको दाबी थियो ।
यसलाई राष्ट्रिय सेनाको एक ठोस उपलब्धिको रूपमा प्रस्तुत गर्दै आफ्नो ज्यान हत्केलामा लिई सशस्त्र विद्रोहीविरुद्ध एकनासले लडेर देशलाई बचाइराखेको भन्दै उनले अफगानिस्तानको राष्ट्रिय सेनाको उत्साह र बहादुरीको मुक्तकण्ठले प्रशंसा गरेका छन् । उनले भने, ‘अब हामी अफगानिस्तानलाई स्थिर, शान्तिपूर्ण र समुन्नत राष्ट्रको रूपमा पुनःनिर्माण गर्नेछौं', राष्ट्रपति घानीले भने ।
पाकिस्तानमा आतंक मचाउँदै आएका विद्रोहीलाई भारतको सहयोगमा अफगानिस्तानले सहयोग गर्दै आएको पाकिस्तानी आरोप छ । गत साता पाकिस्तानी सेना प्रमुख कमर बाजवाले पाकिस्तानमा हुने आतंकवादी क्रियाकलापमा भारतको भूमिका रहेको बताएका थिए । पाकिस्तानले भारतीय गुप्तचर संस्थाले अफगानिस्तानी सरकारसँग मिलेर पाकिस्तानमा आतंकवाद मचाएको आरोप लगाउँदै आएको छ ।
यसै विषयलाई लिएर पाकिस्तानले अफगानिस्तानलाई भारतको सहयोगी बनेर छिमेकीमाथि आतंकवादलाई प्र श्रय दिएको आरोप लगाउँदै आएको छ । हालै पाकिस्तानी सेनाले अफगानिस्तानी सीमाक्षेत्रमा कडा कारबाही सुरु गरेको छ । उक्त आक्रमणमा थुप्रै विद्रोही घाइते भएको र उनीहरूको आ श्रयस्थल ध्वस्त पारेको पाकिस्तानी सेनाले खुलासा गरेको छ ।
उनीहरू लस्कर-ए-इस्लाम र आइएससँग सम्बद्ध रहेको दाबी गरिएको छ । अफगानिस्तानसँगको सीमामा रहेका तुर्खम र चमन प्रवेश नाका पाकिस्तानले बन्द गरिदिएको छ । सीमा क्षेत्रमा शंकास्पद अफगान नागरिकलाई देख्नासाथ गोली हान्ने आदेश पाकिस्तानी सेनाले दिएको छ । केही समययता पाकिस्तान र अफगानिस्तानबीच यातायात र व्यापारमा अवरोध खडा गरिन थालेको छ ।
प्रतिक्रिया दिनुहोस !
