काठमाडौः हुवावे कन्जुमर बिजनेस ग्रुपले आफ्नो उत्पादनमा नयाँ आयामको रूपमा पी १० र पी १० प्लस विश्व बजारमा सार्वजनिक गरेको छ । कम्पनीले बार्सिलोनमा चलिरहेको मोबाइल वल्र्ड कंग्रेसमार्फत आफ्नो नयाँ उत्पादन सार्वजनिक गरेको हो । योसँगै अब फोटो स्टुडियो तपाईंको खल्तीमा हुने भएको छ ।
आकर्षण डिजाइन र उत्कृष्ट प्रविधिका साथ निर्माण गरिएका हुवावे पी १० र पी १० प्लसको क्यामेराका लागि कम्पनीले लाइकासँग सहकार्य गरेको छ । क्यामेराको विश्वबजारमा उत्कृष्ट कम्पनीका रूपमा रहेको लाइकासँगको सहकार्यले हुवावे पी १० र पी १० प्लसको क्यामेरामार्फत अब व्यावसायिक फोटोग्राफी गर्न सकिने कम्पनीको दाबी छ ।
अगाडि र पछाडि दुबैतर्फ लाइकाको क्यामेरा प्रयोग भएको यी स्मार्टफोनमा १२ प्लस २० मेगा पिक्सेलको ड्युल रिएर क्यामेरा र ८ मेगा पिक्सेलको फ्रन्ट क्यामेरा छ । यसको क्यामेरामा फोटो स्टुडियोमा हुने ‘रे लाइट' र ‘थ्रिडी फेसिएल डिटेक्सन' प्रविधि प्रयोग भएको छ । जसले जस्तोसुकै लाइटमा पनि उत्कृष्ट फोटो खिच्न सक्छ ।
क्यामेराले प्रोटेट फोटो लिँदा अनुहारको एक÷एक विवरणसहितको फोटो खिच्न सकिनेछ । कम्पनीले क्यामेरामा कम्पनीको आफ्नै हाइब्रिडयत जुम लेन्स प्रयोग गरेको छ । जसको मद्दतले आफैंले चाहेको वस्तुलाई फोकस गरी उत्कृष्ट रिजोलुसनसहितको फोटो लिन सकिने कम्पनीले जनाएको छ ।
यसका साथै कम्पनीले प्यानटन कलर इन्स्टिच्युटसँगको सहकार्यमा आफ्ना नयाँ उत्पादनलाई समयको मागअनुसार रङमा सार्वजनिक गरेको छ । कम्पनीले प्यानटनको दुई प्रमुख कलर ‘ग्रिनेरी' र ‘ड्याजलिङ ब्लु' कलरका साथै सेरामिक ह्वाइट, ड्याजलिङ गोल्ड, प्रेसटिज गोल्ड, ग्रेफाइट ब्ल्याक, रोज गोल्डलगायत कलरमा स्मार्टफोन सार्वजनिक गरेको छ ।
कटिङ एज टेक्नोलोजीमा आधारित यी स्मार्टफोन प्रविधि र बनावटको मिश्रण भएको कम्पनीले जनाएको छ । कम्पनीका अनुसार यी स्मार्टफोनमा हुवावेको सुपरचार्ज प्रविधि प्रयोग गरिएको छ । हुवावेको पी सिरिजअन्तर्गत ल्याइएको पी १० र पी १० प्लस राउन्डेड कर्भमा आएको छ । अल्ट्रा स्लिम यी स्मार्टफोनमा प्रयोग भएको प्रोसेसर र सुपर कनेक्टिभिटीले फोनलाई सहज बनाएको कम्पनीले जनाएको छ ।
स्मार्टफोनको सार्वजनिक कार्यक्रममा हुवावे कन्जुमर बिजनेस ग्रुपका कार्यकारी निर्देशक रिचार्ड युले हुवावे पी १० र पी १० प्लसले प्रोटेट फोटोग्राफीलाई पुनर्परिभाषित गरेको बताए । उनले लाइकाले निर्माण गरेको स्मार्टफोनमा प्रयोग भएको रिएर र फ्रन्ट क्यामेराले प्रयोगकर्तालाई फोटोग्राफीको नयाँ अनुभव दिने बताएका छन् । साथै, प्यानटनको कलरले स्मार्टफोनलाई बाहिरी रूपमा आकर्षण बनाएको बताए ।
लाइका क्यामेरका कार्यकारी निर्देशक आलिभर क्लान्टनरले हुवावेसँगको सहकार्यले लाखौं स्मार्टफोन प्रयोगकर्ताले प्रोफेसनल फोटोग्राफीको मजा लिन सक्ने बताएका छन् । उनका अनुसार हुवावे पी १० र पी १० प्लसले प्रयोगकर्तालाई उनीहरूको खल्तीमा कलात्मक प्रोटेट फोटो स्टुडियो उपलब्ध गराउनेछ ।
साथै, कम्पनीले चाइनिज डिजाइनर रिकोस्त्रुको सहकार्यमा हुवावे पी १० र पी १० प्लसका लागि आवश्यक एसेसरिज निर्माण गरेको छ । यसमा मिनी स्मार्टफोन ब्याग छ । जसले तपाईंको स्मार्टफोनमा कहिल्यै चार्ज सकिनेछैन । यसका साथै रिकोस्त्रुले ब्रासलेट निर्माण गरेको छ । जुन चार्जरका रूपमा पनि प्रयोग गर्न सकिनेछ । ५.२ र ५.५ इन्चको स्क्रिनमा बजारमा आएको पी १० र पी १० प्लसमा कोरिल्ला ग्लास ५ प्रयोग गरिएको छ ।
एन्ड्रोएड ओएस भि ०.७ मा आधारित यो स्मार्टफोनमा अक्टाकोर प्रोसेसरको प्रयोग गरिएको छ । यो स्मार्टफोन कम्पनीले मार्चमा चाइना र अप्रिलमा एसिया, ल्याटिन अमेरिका, साउथ अफ्रिका र रसियामा सार्वजनिक गर्ने बताएको छ । नेपालमा भने अबको एक महिनाभित्र सार्वजनिक गरिने कम्पनीले जनाएको छ ।
प्रतिक्रिया दिनुहोस !
