आठ वर्षको अन्तरालपछि त्रिभुवन विश्वविद्यालयका आंगिक महाविद्यालय र केन्द्रीय क्याम्पसमा निर्धारित तालिकाअनुसार स्वतन्त्र विद्यार्थी युनियनको निर्वाचन हुन सकेन, सबै ठाउँमा । अर्थात् कुल ६० आंगिक क्याम्पसमध्ये २१ मा मात्र निर्वाचन सम्पन्न भयो भने सम्बन्धन प्राप्तमा पनि अधिकांशमा हुन सकेन ।
निर्वाचन भएका र बिथोलिएका अधिकांश क्याम्पसहरूमा वातावरण तनावपूर्ण रहेको र कतिपयमा हिंसाका घटना हुनुले ज्ञान र मान्यताका आधारमा शास्त्रार्थ हुनुपर्ने ठाउँमा शस्त्रप्रेरित प्रवृत्ति हावी रहेको पुष्टि भएको छ । यसले क्याम्पस र त्यहाँको शिक्षा पद्धतिको अपूर्णता देखाउँछ । स्याङ्जामा एकजना उम्मेदवारले पराजयपछि आत्महत्या गरेको दुःखद समाचार आएको छ ।
यो घटनाको छानबिन भएपछि आत्महत्याको वास्तविक कारण खुल्नेछ, तर यसलाई तत्काल हेर्दा प्रजातन्त्रमा पराजय र विजय जनमतद्वारा निर्देशित फैसला हुनु र त्यसलाई स्वीकार नगर्नु अथवा त्यसमा ग्लानिबोध गर्नु प्रजातन्त्रको सर्वोपरि मान्यता स्वीकार नगर्नुसरह हो । पार्टीका नीति, कार्यक्रम र प्रजातान्त्रिक संस्कारबाट भन्दा व्यक्तिगत रूपमा नेताबाट प्रभावित भई राजनीतिमा आउने युवा पुस्तामा पराजयको अर्थ र सन्देश स्विकार्ने संस्कार निर्माण हुनु नसक्नु अस्वाभाविक हैन ।
आफू दीक्षित भएको पार्टीको ‘व्यवहार' अनुसार निर्वाचनमा विजयीहरूले मुड्की बटारेर ‘लालसलाम' या ‘जय नेपाल' को अभिवादनले मतदातालाई सम्बोधन गर्नेछन्, आगामी केही दिनसम्म । तर त्यससँगै उनीहरूले निर्धारित सबै क्याम्पसमा चुनाव सम्पन्न नहुनु, चुनावी वातावरण बन्न नसक्नु र हिंसाका घटना हुनुलाई गम्भीरताका साथ लिँदै त्यसको आत्मसमीक्षा र आन्दोलन गर्दै हिंसालाई पूर्णरूपमा त्याग्ने प्रतिबद्धता जनाएनन् भने भोलिको सम्भावित राजनीतिक नेतृत्व वर्गको चरित्र अहिलेको भन्दा फरक हुने छैन ।
मुलुकले राजनीतिक नेतृत्वको चरित्रमा विश्वसनीयता र कार्यसम्पादनमा पारदर्शिता अनि राष्ट्रिय र प्रजातान्त्रिक मूल्य मान्यतामा पूर्ण प्रतिबद्धता खोजेको बेला वैकल्पिक राजनीतिका सम्भावित समूह त्यही पुरानै कुप्रवृत्ति र कुसंस्कारको सिकार या निरन्तरताको वाहकको रूपमा देखा पर्नु खेदपूर्ण हो ।
जे होस्, आंशिक रूपमा भए पनि निर्वाचितहरूले भोलिका दिनमा त्यही कुसंस्कारयुक्त नेतृत्वको आदेशपालकका रूपमा काम गर्लान् या क्याम्पसमा उपयुक्त शैक्षिक वातावरण निर्माण गर्न र तिनीहरूलाई दलीय राजनीतिको अखडा बन्नबाट रोक्लान्, त्यसले मात्र उनीहरूको विजयको सान्दर्भिकता स्थापित गर्नेछ ।
प्रतिक्रिया दिनुहोस !
