कोरियाली तनाव कम गर्न चीनको सुझाव

बेइजिङः चीनले कोरियाली द्वीपमा देखिएको विवाद सुल्झाउन अमेरिका, दक्षिण कोरिया र उत्तर कोरियालाई आ-आफ्ना गतिविधि बन्द गर्नुपर्ने बताएको छ । उत्तर कोरियाले परमाणु परीक्षण कार्यक्रम र अमेरिका-दक्षिण कोरियाले संयुक्त सैन्य अभ्यास रोक्नुपर्ने स्पष्ट पारेको छ ।

चिनियाँ विदेशमन्त्री वाङ यीले सञ्चारकर्मीसँग भनिन्, ‘कोरियाली द्वीपमा मडारिरहेको संकट कम गर्न चीनले आग्रह गर्छ । उत्तर कोरियाले आफ्नो परमाणु एवं क्षेप्यास्त्र परीक्षण स्थगित गर्नुपर्छ भने अमेरिका र दक्षिण कोरियाले कोरियाली टापुमा संयुक्त सैन्य अभ्यास तत्काल रोक्नुपर्छ ।'

दुवै पक्षले आपसी समझदारी बनाउन यस्ता गतिविधि रोक्नुपर्ने आग्रह गरिन् । सुरक्षा संकट समाप्त गर्न र वार्तामा बस्न उक्त कार्य अत्यावश्यक भएको उनको भनाइ थियो । दुवै पक्षले भिड्ने वातावरण सिर्जना गरेर वार्ता गर्ने स्थिति नै बन्न नसकेको उनले दाबी गरिन् । कोरियाली क्षेत्रमा शान्ति कायम गर्न दुवै पक्षले लक्ष्मण रेखा पार गर्न खोज्न नहुने उनले सुझाव दिइन् ।

उत्तर कोरियाले परमाणु परीक्षण कार्यक्रमलाई निरन्तरता दिँदै अमेरिकासम्म मार हान्न सक्ने क्षेप्यास्त्र बनाइसकेको छ । अमेरिकाले यसको विरोध गर्दै उत्तरमाथि नाकाबन्दी लगाउँदै आएको छ । अमेरिकाले दक्षिण कोरियामा टर्मिनल हाई अल्टीच्युड एरिया डिफेन्स (थाड) क्षेप्यास्त्र तैनाथीको पनि चीनले निन्दा गरेको छ । अन्य विकल्प हुँदाहुँदै उत्तर कोरिया, दक्षिण कोरिया र अमेरिकाले तनावपूर्ण वातावरण सिर्जना गरेको उनले बताइन् ।
दुवै पक्षले आ-आफ्ना उत्तेजक गतिविधि बन्द गरे कोरियाली द्वीपमा शान्ति कायम गर्न चीनले सहयोग गर्ने स्पष्ट पारिन् ।

उत्तर कोरियाले मंगलबार एकैपटक चारवटा प्रतिबन्धित शक्तिशाली क्षेप्यास्त्र परीक्षण गरेको थियो । चारवटै क्षेप्यास्त्र करिब एक हजार किलोमिटरको दूरीसम्म आकाशमा उडी समुद्रमा झरेका थिए । चारमध्ये तीनवटा क्षेप्यास्त्र जापानी सागरमा खसेका थिए । उत्तर कोरियाले विभिन्न शृंखलाका साना, ठूला आधुनिक क्षेप्यास्त्रहरू निरन्तर परीक्षण गर्दै आइरहेको छ । अमेरिका र दक्षिण कोरियाबाट जहिले पनि उत्तर कोरियालाई खतरा रहेको भन्दै उत्तर कोरियाली राष्ट्रपति किम जोङ उन आफ्नो मुलुकको आणविक शक्ति र क्षेप्यास्त्र क्षमता वृद्धि गराउन खुलेरै लागेका छन् ।

केही समयअघि अमेरिका र उत्तर कोरिया मिलेर संयुक्त रूपमा विशाल सैनिक अभ्यास प्रदर्शन गरेकामा त्यसकै जवाफ स्वरूप उत्तर कोरियाले क्षेप्यास्त्र परीक्षण नरोक्ने दाबी गर्दै आएको छ । सोल र वासिङटनले गत साता वार्षिक संयुक्त सैन्य अभ्यास सुरु गरेका थिए । यसबाट उत्तर निकै आक्रामक देखिएको छ । ती दुई देशबीचको संयुक्त सैन्य अभ्यास ‘फोल इगल' सुरु भएको भोलिपल्टै त्यसको जवाफमा शत्रु सेनाका विरुद्ध परमाणु कारबाही गर्ने चेतावनी दिएका थियो ।

उत्तर कोरियाको सरकारी समाचार समिति केसीएनएले ‘अमेरिकी साम्राज्यवादी र त्यसको कठपुतली दक्षिण कोरियाली सेनाले उत्तर कोरियाको छेउमै खतरनाक परमाणु युद्ध अभ्यास फेरि सुरु गरेको' उल्लेख गर्दै त्यसको कडा जवाफ दिने चेतावनी दिने बताउँदै आएको छ ।