पूर्वमा चलचित्र छायांकन बढ्दो 

दमकः पूर्वमा नेपाली चलचित्र छायांकन गर्ने क्रम बढेको छ । यतिबेला पूर्वका इलाम, झापा, धनकुटा, सुनसरीलगायतका जिल्लामा रहेका सुन्दर एवं रमणीय स्थलमा दर्जनौं चलचित्र छायांकन गरिएका छन् । यसअघि धेरैजसो चलचित्र राजधानी र त्यस आसपासमै बढी छायांकन हुने गरेका थिए ।

नेपाली चलचित्रमा कहलिएका छायाकार पुरुषोत्तम प्रधानका अनुसार कथा र लोकेसनले पूर्वेली जनजीवन माग्ने गरेकाले चलचित्रहरू पूर्वमा छायांकन गर्ने क्रम बढेको हो । पछिल्लो समय मौलिक शैलीका चलचित्रले स्थान पाउन थालेकाले पनि पूर्वमा छायांकन गर्ने क्रम बढेको देखिन्छ । ‘अहिलेका चलचित्रमा पूर्वेली जनजीवन उतार्ने क्रम बढेको छ', प्रधानले भने । खासगरी इलामको चियाबगान, धनकुटाको भेडेटार, झापाको दौमुखा, जामुनखाडीजस्ता स्थान चलचित्र छायांकनका लागि उपयुक्त रहेको उनको भनाइ छ ।

नेपाली चलचित्र निर्माणमा नयाँ प्रविधिको प्रयोग बढेसँगै सामान्य स्थानलाई पनि उत्कृष्ट देखाउन सकिन्छ । त्यसमाथि सुन्दर र रमणीय स्थानले त यसै पनि दर्शकको मन छुन्छ । सफल मानिएको नेपाली चलचित्र ‘साथी'को झापाको दौमुखा तथा इलाममा छायांकन भएसँगै नेपाली चलचित्रको छायांकन पूर्वमा गर्ने क्रम बढेको निर्देशक योगेश घिमिरेको भनाइ छ । चलचित्र साथी, बरपीपल, नोटबुक, राधा, नोभेम्बर रेन, बाटोमुनिको फूल–२ लगायतका धेरै चलचित्रमा पूर्वी नेपालका रमणीय स्थानहरू समेटिएका छन् ।

पर्यटकीय स्थलको विकास, कम लागत, यातायातको सुविधा, छिटो र सहज काम सम्पन्न हुने भएकाले पूर्वी नेपाल छायांकनका लागि रोजाइमा पर्न थालेको हो । राजधानी र आसपासमा वर्षौंदेखि चलचित्र छायांकन हुने भएकाले नयाँ लोकेसन भएकाले पनि यस्तो अवस्था आएको चलचित्रकर्मीको भनाइ छ । इलामको कन्याम, फिक्कल, श्रीअन्तु, धनकुटाको भेडेटार, सुनसरीको बूढासुब्बा, झापाको जामुनखाडी, दौमुखा, बर्नेईको चियाबगान, झिलझिलेमा रहेको मसलाको वन, दमक, बिर्तामोडलगायतका स्थानमा कतै न कतै हरेक दिनजसो नेपाली चलचित्रको छायांकन भइरहेको देखिन्छ ।

इलामको चियाबगान, धनकुटाको भेडेटार, झापाको दौमुखा, जामुनखाडीजस्ता स्थान चलचित्र छायांकनका लागि उपयुक्त ठहरिएका छन् ।

पाथीभरा चलचित्र प्रालिका सञ्चालक तथा पूर्वाञ्चल वितरक चैतन्य बरालका अनुसार चलचित्रको प्रमोसनमा पूर्वमा आउने जति पनि चलचित्रकर्मी छन्, उनीहरूका लागि पूर्वमा छायांकनयोग्य र राम्रा ठाउँहरू रहेकाले आकर्षित भएका हुन् । ‘राजधानीमा मात्रै केन्द्रित रहँदै आएको चलचित्रका सबै कार्यक्रम पूर्वतिर आकर्षित हुन थालेको छ', निर्देशक घिमिरेले भने, ‘छायांकनमात्र होइन; पूर्वले अब्बल कलाकार, निर्माता, निर्देशकसमेत जन्माइरहेको छ ।' केही दिनअघि झापाको दमकमा नेपाली चलचित्र ‘शिवम्'को शुभमुहूर्त गरिएको थियो । सो अवसरमा निर्देशक राजु गिरीले यस चलचित्रको सम्पूर्ण छायांकन पूर्वमै सम्पन्न गर्ने बताए । चलचित्रमा पूर्वाञ्चलका स्थानीय कलाकारहरूले समेत अभिनय गरेका छन् ।

चलचित्र ‘यो साइनो माया' को छायांकन सबै पूर्वकै विभिन्न ठाउँमा गरिएको नायक जतिन ताम्राकारले बताए । त्यस्तै भुटानी शरणार्थीको कथा बोकेको चलचित्र ‘रिफ्युजी', झापाकै सञ्चारकर्मी डिकेश लामाको निर्देशनमा ‘कखरा'को पनि दमकमा छायांकन गरिएको थियो । चलचित्रमात्र हैन, म्युजिक भिडियोसमेत पूर्वका मनोरम ठाउँमा छायांकन गर्ने क्रम बढ्दो छ ।