पक्की पुल बन्न थालेपछि गाउँले हर्षित

भनभने गुल्मीः निर्माण कार्य थालिएको पाँच वर्षपछि धुर्कोट (रजस्थल)-भनभने जोड्ने पक्की पुलले गति लिएको छ । धुर्कोट-९ रजस्थलस्थित पनाह खोलामा २०६८ सालमा पुलको निर्माण कार्य सुरु गरिएको हो । बेलाबेला आउने बाढीपहिरो र बाढीले निर्माण सामग्री बगाएपछि निर्माण कार्य प्रभावित भएको निर्माण व्यवसायी बताउँछन् ।

पुल नुहँदा बर्सौंदेखि यस क्षेत्रमा पर्ने धुर्कोट, वाग्ला, सिर्सेनी, भनभने, पुर्कोटदह, बाँझकटेरी, अग्लुङ, मलागिरीसहित छिमेकी जिल्ला प्युठान ओहोरदोहोर गर्ने सर्वसाधरणलाई सास्ती भएको छ । ‘पाँच वर्ष भयो पुल बन्न सुरु गरेको', धुर्कोट रजस्थल-९ का स्थानीय दयानिधि पन्थीले भने, ‘यसपालि बन्छ कि जस्तो छ ।' पुल निर्माण कार्यले तीव्रता पाएपछि यहाँका स्थानीय हर्षित भएको उनले जानकारी दिए ।

‘वर्षात्मा खोला वारपार गर्न निकै कठिन हुन्थ्यो', पन्थीले भने, ‘धेरै वर्ष ज्यानै जोखिममा राखेर वारपार गर्‍यौँ । पुल बन्ने भएपछि खुसी लागेको छ ।' सदरमुकाम तम्घासबाट सामान लिएर व्यवसाय गर्नेहरूलाई वर्षात्को समयमा धेरै समस्या हुने गरेको उनले गुनासो गरे । ‘खोलाको त्रासले हिँउदमै व्यवसायीले धेरै सामान स्टक राख्नुपर्ने बाध्यता छ', उनी भन्छन्, ‘सामान स्टक राख्दा धेरै त म्याद गुज्रिएरै फालेको देख्थ्यौँ ।'

सदरमुकाम तम्घासदेखि जिल्लाको पश्चिम क्षेत्रमा पर्ने बजार पुर्कोटदहसम्म पुग्न यो नै एक मात्र सडक भएको धुर्कोटकै स्थानीय महेन्द्र भण्डारीले जानकारी गराए । ‘वर्षात्मा करिब चार/पाँच महिनासम्म खोलाको त्रासले सडक ठप्पै हुन्छ', उनले भने, ‘कच्चीबाटो त्यसैमा खोलाको त्रासले सर्वसाधरण ओहोरदोहोर गर्दैनन् ।' पुल बन्ने आसले आफूहरू धेरै खुसी भएको उनले सुनाए ।

निर्माणको जिम्मा लिने कम्पनी फेरवदल भइरहने र भूकम्पका कारण समयमा पुल निर्माण हुन नसकेको तमघास-सिमलटारी-प्युठान सडक आयोजनाका सूचना अधिकारी अचुतविलास पन्तले जानकारी दिए । उनका अनुसार पनाहाखोला-जुरेढुंगा पक्की पुल ०६८/०६९ मा सम्झौता भई ०७१ साल असार मसान्तभित्र सम्पन्न गर्ने गरी मेचीको ऐन कम्पनीलाई जिम्मा दिइएको थियो । दुई करोड ७३ लाख २५ हजार रुपैयाँ कुल लागतमा निर्माण गर्ने योजना रहेको उनले बताए । पुलको लम्बाइ २५ दशमलब ५० मिटर छ । पन्तका अनुसार कुल बजेटको ३८ प्रतिशत रकम खर्च भइसकेको छ ।

२०७१ असार मसान्तमै निर्माण कार्य सक्नुपर्ने भए पनि प्राविधिक कारणले निर्माण सम्पन्न हुन नसकेको आयोजना प्रमुख सुजन अधिकारीले जानकारी दिए । उनका अनुसार चालु आर्थिक वर्षभित्रै पुल निर्माणको काम सकिने छ । ‘यसपालिको वर्षात्मा ढुक्कसँग यातायात चल्नेछन्', उनले भने, ‘निर्माणको काम तीव्र पारिएको छ ।' हाल निर्माणको जिम्मा मेचीको जेभी काठमाडौँले पाएको प्राविधिक सुमन बरालले जानकारी गराए ।