गीतमा एन्टिबाइटिक!

काठमाडौं: बिरामी परेकालाई सामान्य औषधिले काम नगरे एन्टिबाइटिक दिइन्छ । गायक गम्भीरजंग रायमाझीले गीतमै एन्टिबाइटिक खोज्ने प्रयत्न गरेका छन् । तीन दशकदेखि व्यायाम पेशामा संलग्न रायमाझीले ४० वशन्त पार गरेपछि आफूमा दबाएर राखेको कला बाहिर ल्याएका हुन् ।

३० वर्षदेखि सेवाग्राहीलाई जिम, व्यायाम गराउँदै आएका रायमाझीलाई लाग्यो, ‘मानिस पूर्ण स्वस्थ्य हुन त शारीरिक र मानसिक स्वास्थ्यको खाँचो हुँदो रैछ ।’ व्यायामले शरिरलाई तन्दुरुस्त राखे पनि मानसिक स्वास्थ्यका लागि संगीत नै उपयुक्त हुने उनले देखे । अनि गाएः

पेनकिलरले छोएन मायाको घाउ
कान्छी, एन्टिबायोटिक देऊ,
कुटुकुटु खान्छ कलेजीको छेउ
कान्छी एन्टिबायोटिक देऊ ।

सानो छँदा हजुरआमासँग वागमती किनारमा रहेको प्रयागघाटमा भजन गाएको उनले सम्झे । अनि ‘ग्याम्बिज’ क्याफे चलाउँदा पाहुनाका लागि गीत गाउँदाको अनुभवलाई उनले यस गीतमा खार्न पाएको बताए । शेखर सुवेदीका शब्द, कल्याण सिंहको संगीतलाई दयराज पौडेलले एरेन्ज गरेपछि रायमाझीले स्वर भरेका हुन् । <iframe src="//www.youtube.com/embed/aD5UMW5REe0" width="750" height="425" frameborder="0" allowfullscreen="allowfullscreen"></iframe>

२०३० सालमा काठमाडौंको बानेश्वरमा आमा स्व. राज रायमाझी र बुवा स्व. बच्चुराम रायमाझीका तीन सन्तानमध्ये उनी एक हुन् । २०४३/४४ देखि नै व्यायाम पेशामा लागेका उनले जिमका मिस्टर नेपाल उदय श्रेष्ठसँग जिम सिकेका थिए । रत्नराज्यबाट बीकम अध्ययन गरेका उनले २०४८ सालमा भिमसेनगोलामा ‘किङकम क्लब’मा जिम सिकाए । ‘पेशाले यता लागेपनि मनको भित्र कतै गीत/संगीतप्रति गहिरो लगाव थियो’, सायमाझीले भने, ‘ढिलै भए पनि यो गीत ल्याएँ ।’

२०५३ सातयता उनले वानेश्वरमा ‘कम्पलिट हेल्थ क्लब’ सञ्चालनमा ल्याए । क्लबबाट कम्तिमा दुई लाख सदस्यले स्वास्थ्य लाभ लिइसकेका छन् । उनलाई लाग्यो ‘मानिस सम्पूर्ण रुपमाले स्वस्थ्य हुन मानसिक रूपमा पनि स्वस्थ्य हुनुपर्‍यो ।’ त्यसका लागि उनले आधुनिक पाराको पप गीत एन्टिबाइटिक गाए ।

युट्युबमार्फत सार्वजनिक गरिएको यो गीत दुई सातामै करिब ७४ हजारले रुचाइसकेका छन् । व्यापारिक उद्देश्य नभए पनि मानिसहरुको व्यस्तता, भागदौड र तनावका बीचमा पनि गीतले सुद्ध मनोरञ्जन देओस भन्ने उनको चाहना हो । ‘गीतको रेस्पोन्स र मैले पाएको प्रतिक्रियाले मलाई संगीतप्रति जिम्मेवारीबोध गराएको छ’, गायक रायमाझीले भने ।