अन्तर्राष्ट्रियकरणमाथि बहस

काठमाडौः युग विश्वव्यापीकरणको हो तर नेपाली चलचित्र यसबाट धेरै पछाडि छ । नेपालभन्दा पछि सुरु भएका कतिपय मुलुकका चलचित्र उद्योगले विश्वमा आफ्नो दर्बिलो उपस्थिति जनाइसकेको छ । नेपाल किन पछि पर्‍यो त ? यही विषयमा शनिबार राजधानीमा छलफल भएको छ । ह्युमन राइट्स फिल्म सेन्टरको आयोजनामा राजधानीमा जारी ‘पाँचौं नेपाल मानवअधिकार अन्तर्राष्ट्रिय चलचित्र महोत्सव’मा नेपाली चलचित्रको अन्तर्राष्ट्रियकरणसम्बन्धी छलफल गरिएको हो ।

छलफलमा नवीन सुब्बा, क्षितिज अधिराज र अशोकप्यासी राई सहभागी थिए । उनीहरूलाई सचिन घिमिरेले सहजीकरण गरेका थिए । अग्रज चलचित्रकर्मी नवीन सुब्बाले चलचित्रको अन्तर्राष्ट्रियकरण पैसाका लागि नभएर भाषा, संस्कृति र मौलिकताका लागि बढी सार्थक हुने बताए । मौलिक चलचित्र निर्माणका अभियन्ताका रूपमा परिचित सुब्बाले यस क्षेत्रको विकास र विस्तारमा राज्यका तर्फबाट ठोस काम हुन नसकेको विचार व्यक्त गरे ।

अर्का चलचित्रकर्मी क्षितिज अधिराजले नेपाली चलचित्रको वर्तमान अवस्थाको चित्रण गर्दै नयाँ सोचका साथ चलचित्र क्षेत्रमा आएका युवाहरूले यस क्षेत्रमा आशा जगाएको बताए ।

नेपाली चलचित्रको अन्तर्राष्ट्रियकरण पैसाका लागि नभएर भाषा, संस्कृति र मौलिकताका लागि बढी सार्थक हुन्छ ।

उनले पछिल्लो समय अन्तर्राष्ट्रिय चलचित्र महोत्सवमा नेपाली चलचित्रको सहभागिता बढे पनि योजना र स्पष्ट दृष्टिकोणबिना सहभागी भएरमात्रै उपलब्धि हासिल नहुने बताए । त्यसैगरी छलफलमा सहभागी अशोकप्यासी राईले नेपाली भाषी र आप्रवासी नेपालीको बाहुल्य रहेको मुलुकमा नेपाली चलचित्र नियमित प्रदर्शन गर्ने वातावरण निर्माण एवं अन्तर्राष्ट्रिय चलचित्र महोत्सवमा सहभागिता जनाएर नेपाली चलचित्रलाई अन्तर्राष्ट्रियकरणतर्फ उन्मुख गर्न सकिने विचार व्यक्त गरे ।

महोत्सवमा क्यानडा, बेलायत, इरान, अफगानिस्तान, म्यानमार, सिरिया, इटाली, स्पेन, जोर्डनलगायत विभिन्न मुलुकका सांस्कृतिक पाटोसहित मानवअधिकारसँग जोडिएका चलचित्र समेटिएका छन् । महोत्सवमा निर्णायकले छनोट गरेका चारवटा चलचित्रलाई ‘राइनो’ अवार्ड प्रदान गरिनेछ । महोत्सवमा निर्देशक तुलसी घिमिरे, भारतीय चलचित्र निर्देशक गिरिश कसरावल्ली, बंगलादेशका चलचित्र समीक्षक अमेद मुज्ताब जामल र डच चलचित्र निर्माता क्लेमेन्टाइन इड्रिभनले निर्णायकको भूमिका निर्वाह गर्नेछन् ।