धुर्मुस-सुन्तलीलाई अमेरिकावासीको साथ

काठमाडौं : विसं २०७२ वैशाखमा नेपालमा गएको विनाशकारी भूकम्पले नेपाली जनजीवन नराम्ररी प्रभावित भयो । आठ हजारभन्दा बढीको ज्यान गयो हजारौं घाइते भए, लाखौं नेपाली घरबारविहीन बने । नेपाली यस्तो पीडामा रहेका बेला हास्य कलाकार दम्पती सीराराम कट्टेल (धुर्मुस) र कुञ्जना घिमिरे (सुन्तली) विदेशमा थिए । आफ्नो देशमा परेको पीडाले उनीहरू नराम्ररी रन्थनिए ।

अमेरिकाका विभिन्न स्थानमा तयारी गरिएका केही कार्यक्रमसमेत रद्द गरेर उनीहरू नेपाल फर्किए । मनमा लागेको दुःख र नेपालीलाई परेको पीडामा कसरी सहयोग गर्ने भन्ने उपायको खोजीमा लागे उनीहरू । त्यसका लागि गाउँगाउँमा गएर सकेको राहत बाँडे । काभ्रे र सिन्धुपाल्चोकमा पीडितका लागि सामूहिक आवास बनाए ।

हाल महोत्तरीको मुसहर बस्तीमा आवास निर्माण गरिरहेका उनीहरूको असल कामलाई बोस्टनवासी नेपालीले होस्टेमा हैंसे गरेका छन् । बोस्टनवासी नेपालीले सधैंझै यसपटक पनि सहयोग र समर्थन गरेका हुन् । धुर्मुस-सुन्तली फाउन्डेसनले चलाएको 'धुर्मुस-सुन्तली अभियान' सहयोग कार्यक्रममा भएको स्वस्फूर्त र उत्साहजक सहभागिताले करिब १३ लाख रुपैयाँ सहयोग संकलन गरेको हो ।

संकलित सम्पूर्ण रकम धुर्मुस-सुन्तली फाउन्डेसनको खातामा पठाइने भएको छ । उक्त रकमबाट कुनै पनि खर्च नकटाइने गरी रकम पठाइने जनाइएको छ । सहयोगका लागि आयोजित कार्यक्रममा बोस्टन क्षेत्रलगायत छिमेकी राज्य कनेटिकटबाट पनि नेपालीको उत्साहजनक सहभागिता र सहयोग प्राप्त भएको थियो । कसैले कार्यक्रम आयोजना नगरे पनि कार्यक्रम गर्न हल तथा खानाको सौजन्य बोस्टन, वेस्टरक्सवरीस्थित हिमालय विस्ट्रोले गरेको थियो ।

कार्यक्रममा लेखक शिवप्रकाशले पावर प्वइन्ट प्रस्तुत गरेका थिए । यसमा मातृभूमिको रक्षा गरौ, असल र इमानदारलाई समर्थन र सहयोग गरौं, बेइमान र भ्रष्टलाई सामाजिक रूपमै बहिष्कार गरौं भन्ने विषय समेटिएको थियो । उनले 'विदेश बसेर पनि नेपालका भ्रष्ट नेताको खराउपूजा नगरौं, यो आफैंमा घृणा र लज्जास्पद कर्म हो' भन्ने धारणा राखेका थिए ।

सहयोग बर्दिबासमा निर्माणाधीन मुसहर बस्तीका लागि संकलन गरिएको हो । कार्यक्रम बोस्टनका जागरुक र स्वस्फूर्त नेपालीको सक्रियतामा आयोजना भएको हो ।