स्मार्ट कार्डका लागि एडीबीसँग सहयोग माग

काठमाडौं : सवारी चालक अनुमतिपत्र (स्मार्ट लाइसेन्स) कार्ड अभाव भएपछि सरकारले एडीबीसँग सहयोग मागेको छ । स्टक स्मार्ट कार्ड वैशाखसम्ममा नै सकिने भएपछि फास्ट्र्याकमार्फत कार्ड छपाइ गरी उपलब्ध गराइ दिन एडीबीलाई पत्रचार गरिएको छ ।

विभागका महानिर्देशक रुपनारायण भट्टराईले बागमती अञ्चल यातायात कार्यालयमा लाइसेन्सकै लागि आवेदन दिएका ४४ हजारभन्दा बढी सेवा ग्राहीको कार्ड छाप्ने कार्य पाइपलाइनमा रहेको जानकारी दिए । तर, विभागसँग अहिले पाइपलाइन रहेका बाहेक स्टकमा १२ हजारभन्दा बढी काड छैन । यी कार्ड वितरण भएसँगै विभागका कार्ड अभाव आउने निश्चित रहेको भट्टराई बताउँछन् । कार्ड सकिएपछिको व्यवस्थापन गर्न आफूहरूले एडीबीलाई ८० हजार काड छपाइ गरी सहयोगका लागि पत्रचार गरेको उनले बताए ।

एडीबीले पनि विभागको पत्र पाउनासाथ कार्ड छपाइको प्रक्रिया सुरु गरेको जानकारी आफूले पाएको उनले बताए । ८० हजार कार्ड आएको अवस्थामा असार महिनासम्म थेग्न सकिन्ने उनको भनाइ छ । त्यसपछिका लागि भने विभागले यही चैत महिनाभित्र कार्ड छपाइका लागि टेन्डर गर्ने गरी काम थालेको उनले बताए ।

एडीबीले समयमै कार्ड उपलब्ध गराउन नसके वैशाखदेखि अभाव हुने उनको भनाइ छ । 'स्मार्ट कार्ड सकिए पनि कागजी लाइसेन्समा जाने कुरा हुन्न', उनले भने, 'सेवाग्राहीका लागि केही समय कुराउने नै हो।'

                         एडीबीले समयमै कार्ड उपलब्ध गराउन नसके वैशाखदेखि अभाव हुने ।

विभागले २०७२ मंसिरदेखि पहिलो चरणमा बागमती यातायात कार्यालयबाट स्मार्ट लाइसेन्स वितरण सुरु गरेको थियो । भारतको मद्रास सेक्युरिटी कम्पनीले उपलब्ध गराएको एक लाख ६० हजार कार्ड पुनः दोस्रोपटक मद्रास पिन्टरले नै दिएको कार्डबाट काम चलाउँदै आएको थियो । विभागका पूर्वमहानिर्देशक चन्द्रमान श्रेष्ठको लापरबाही कै कारण डेढ वर्ष हुँदा पनि काड छपाइको टेन्डर हुन नसक्दा अहिले समस्या भएको विभाग स्रोत बताउँछ ।

विभागले पाँच वर्षभित्र देशभरका यातायात कार्यालयबाट सबै सवारी चालकको हातमा स्मार्ट लाइसेन्स पुर्याउने गरेको प्रतिबद्धता पनि फेल भएको छ । डेढ वर्ष हुँदासम्म विभागले यातायात कार्यालयबाट समेत सेवा ग्राहीलाई समयमै कार्ड उपलब्ध गराउन सकेको छैन । विभागले कार्ड अभाव हुँदै गएपछि सर्वर डाउन भएको भन्दै कतिपय दिनमा त काम नै रोक्दै आएको छ । विभागमा भखरै आएका नयाँ निर्देशक भट्टराईलाई पुरानो समस्या समाधान गर्न भ्याइनभ्याइ छ ।