बार्सिलोनाका निर्देशक भन्छन्–मेसी र इनिष्टाले सम्झौता नवीकरण गर्छन्

काठमाडौंः अर्जेन्टिनी स्टार खेलाडी लियोनल मेसीले यो सिजनको अन्तिममा बार्सिलोना छोड्ने हल्ला चलिरहेका बेला बार्सिलोनाका निर्देशक रोवर्ट फर्नान्डेजले भने मेसीले बार्सिलोना नछोड्ने दाबी गरेका छन्।

उनले स्टार खेलाडी लियोनल मेसी र कप्तान आन्द्रे इनिष्टा अझै धेरै वर्ष बार्सिलोनामै रहने बताएका हुन्। निर्देशक रोवर्टले मेसी र इनिष्टाले छिट्टै बार्सिलोनासँग सम्झौता नवीकरण गर्ने बताए। उनले सम्झौता सकिन बाँकी नै रहेकाले अहिले नै मेसी र इनिष्टाले बार्सिलोना छोड्छन् भनेर आत्तिनु नपर्ने बताएका छन्। उनले अर्जेन्टिनी स्टार मेसी बार्सिलोनामै खुशी रहेको बताए।

उनले भने,‘अझै धेरै समय मेसी बार्सिलोनामै बस्न चाहन्छ, बार्सिलोनामै खुशी छ र उसका लागि वातावरण यही राम्रो छ। मेसीले बार्सिलोनासँग नयाँ सम्झौता गर्छ मैले पहिलेदेखि नै भन्दै आएको छु।’  निर्देशक रोवर्टले मेसीले बार्सिलोनासँग नयाँ सम्झौता नगर्ने कुरा आफूले कल्पनासमेत नगरेको बताए। ‘म धेरै कुरा बोल्न चाहन्न। मेसीसँग कुरा भइरहेको छ र ऊ बार्सिलोनामै रहन्छ ढुक्क हुनुस्,’ उनले भने।

उनले कप्तान इनिष्टाले पनि बार्सिलोनासँगको सम्झौता लम्ब्याउनेमा आफू विश्वस्त रहेको बताएका छन्।