नेपालमा बस्ने भारतीयको पञ्जीकरण दर्ता
नेपालगन्जः भारतीय राजदूतावासले नेपालमा बसोवास गर्ने भारतीय नागरिकको पञ्जीकरण प्रमाणपत्र दर्ता गराएको छ । नेपालगन्ज उद्योग वाणिज्य संघ र नेपाल-भारत मैत्री संघको सहकार्यमा राजदूतावासले नेपालगन्जमा उद्योग, व्यवसाय तथा विभिन्न पेसामा संलग्न आफ्ना नागरिकको प्रमाणपत्र दर्ता गराएको हो ।
भारतीय राजदूतावासका अतासे काउन्सिलर सोनम अन्चुकको नेतृत्वमा नेपालगन्ज आएको तीनजनाको टोलीले पञ्जीकरण प्रमाणपत्र दर्ता गराएको छ । आइतबार नेपालगन्जमा राजदूतावास काठमाडौंको आयोजनामा पञ्जीकरण प्रमाणपत्र दर्ता कार्यक्रम सञ्चालन भएको छ ।
नेपालगन्ज उवासंघका अध्यक्ष नन्दलाल वैश्य, राजदूतावासका काउन्सिलर अन्चुकलगायतको उपस्थितिमा तीन सय ५० जना भारतीय नागरिकको पञ्जीकरण प्रमाणपत्र दर्ता गरिएको संघका महासचिव अजयकुमार टण्डनले जानकारी दिए । पञ्जीकरण प्रमाणपत्र निःशुल्क दर्ता गरिएको उनले बताए । उक्त कार्यक्रम दुई दिन सञ्चालन हुनेछ ।
पञ्जीकरण प्रमाणपत्र दर्तापछि भारतीयले सीमित पुँजीको उद्योग-व्यवसाय नेपालमा सञ्चालन गर्न पाउनेछन् भने उनीहरूको उद्योग-व्यवसाय पान र भ्याट दर्ता हुनेछ । साथै उनीहरूले बैंक खातासमेत खोल्न सक्छन् । भारतीय गाडीसमेत किन्न सजिलो हुन्छ ।
पञ्जीकरण प्रमाणपत्र दर्ता कार्यक्रम दुई दिन सञ्चालन हुनेछ ।
पञ्जीकरण दर्ता कार्यले नेपालमा बसिरहेका भारतीयको तथ्यांक संकलन हुनुका साथै नेपाल सरकारलाई भारतीय आपराधिक व्यक्तिको प्रवेश नियन्त्रणमा सहयोग हुने महासचिव टण्डनले बताए । ‘नेपालमा कस्ता भारतीय बसेका छन्, केके पेसामा आबद्ध छन्, आपराधिक पृष्ठभूमिका कोही छन्÷छैनन्, त्यसको विवरणसमेत पञ्जीकरण दर्तापछि थाहा लाग्छ', उनले भने ।
प्रतिक्रिया दिनुहोस !
