मेयरको टिकट लिन दौडधुप
हेटौंडाः स्थानीय निकायको निर्वाचन नजिकिँदै गर्दा हेटौंडा उपमहानगरपालिको मेयर कसलाई बनाउने भन्नेबारे चर्चा सुरु भएको छ । यससँगै राजनीतिक दलभित्र मेयर उम्मेदवारको टिकट लिन दौडधुप गर्नेहरू पनि बढेका छन्।
राजनीतिक दलभित्र पनि कसलाई उम्मेदवारका रूपमा अघि सार्ने भन्नेबारे रस्साकस्की जारी छ । एउटै पार्टीभित्र ६ जनासम्मको नाम चर्चामा छ । तत्कालीन हेटौंडा नगरपालिकामा पाँचवटा गाविस थप भई उपमहानगरपालिका बनेपछि सांसदभन्दा मेयर बन्न नेताहरू दौडधुपमा लागेका हुन् । कांग्रेस, एमाले, माओवादी केन्द्र, नयाँ शक्ति, राप्रपा, नेकपा मालेलगायत पार्टीका नेता मेयर उम्मेदवारको टिकट लिन जिल्लादेखि पार्टीका केन्द्रीय नेतासमक्ष लबिङ गर्दै आफ्नो पक्षमा माहोल बनाउन लागिपरेका छन् ।
कांग्रेसभित्र मेयरका लागि हालसम्म आनन्दराम पराजुली र अशोक शाक्यको नाम चर्चामा छ । मेयरको चर्चामा रहेका पराजुली कांग्रेस नगर सभापति तथा निर्माण व्यवसायी संघ मकवानपुरका अध्यक्ष हुन् । पार्टीले जिम्मेवारी दिए आफू उपमहानगरपालिका प्रमुख भई भूमिका निर्वाह गर्न इच्छुक रहेको उनले बताएका छन् । शाक्य कांग्रेस मकवानपुरका पुराना नेता हुन् ।
दोस्रो संविधानसभा निर्वाचनमा मकवानपुरमा पहिलो पार्टी बनेको एमालेमा सबैभन्दा बढी मेयरका आकांक्षी छन् । तत्कालीन हेटौंडा नगरपालिकाका मेयर डोरमणि पौडेल, उपमेयर हरिबोल महत, एमाले जिल्ला अध्यक्ष मुनु सिग्देल, नेताहरू एकलाल श्रेष्ठ, विष्णु ओझा र फुर्वा लामा मेयरको टिकट लिन दौडधुपमा रहेको बताइएको छ ।
राजनीतिक दलभित्र कसलाई उम्मेदवारका रूपमा अघि सार्ने भन्नेबारे रस्साकस्की जारी छ । एउटै पार्टीभित्र ६ जनासम्मको नाम चर्चामा छ ।
सरकारको नेतृत्व गरिरहेको पार्टी माओवादी केन्द्रमा मेयरका लागि कसैले पनि खुलेर लबिङ गरेका छैनन् । माओवादी केन्द्र हेटौंडा उपमहानगरपालिका इन्चार्ज बलराम बल र नेता प्रकाश पाण्डेको नाम चर्चामा छ । निकटका सामाजिक व्यक्तिलाई पनि उम्मेदवारका रूपमा अघि सार्ने सम्भावना रहेको माओवादी स्रोतले बतएको छ ।
राप्रपामा भने मेयर बन्न सांसद गणेश थापा र संविधानसभा निर्वाचनका प्रत्यासी दीपकबहादुर सिंहको चर्चा छ । थापा पार्टी केन्द्रीय अध्यक्ष कमल थापाका भाइ हुन् । भने सिंह दोस्रो संविधानसभा निर्वाचनमा मकवानपुर तीन नम्बर निर्वाचन क्षेत्रका सांसद अनन्त पौडेलसँग एक हजार मतअन्तरले पराजित भएका थिए ।
नयाँ शक्ति पार्टीले पनि स्थानीय निकाय निर्वाचनमार्फत आफ्नो जनमत जाँच्दैछ । नयाँ शक्तिले नेताहरू राजेन्द्र सिंखडा र राजन मैनालीमध्ये एकजनालाई उम्मेदवार बनाउने चर्चा छ । नेकपा मालेमा भने सचिव भीमसेन महतको चर्चा छ । महतले भ्रष्टाचार र अनियमितताविरुद्ध आवाज उठाउँदै आएका छन् ।
प्रतिक्रिया दिनुहोस !
