इस्को भन्छन्–रियल मड्रिडले ला लिगा र च्याम्पियन्स लिग दुवै जित्न सक्छ

काठमाडौंः मिडफिल्डर इस्कोले रियल मड्रिडले यो सिजन ला लिगा र च्याम्पियन्स लिग फुटबल दुवैको उपाधि जित्न सक्ने बताएका छन्। उनले दुवै लिगको उपाधि जित्न आवश्यक पर्ने खेलाडी रहेको बताएका छन्।

रियल मड्रिडले सन् २०१२ मा ला लिगाको उपाधि जिते यता ला लिगाको उपाधि उचाल्न सकेको छैन। यो सिजन ला लिगाको शीर्ष स्थानमा रियल मड्रिड छ। बार्सिलोनाभन्दा लिगमा एक खेल कम खेलेको रियल मड्रिड तालिकामा दुई अंकले अगाडि छ।

अघिल्लो सिजन च्याम्पियन्स लिग फुटबलको उपाधि जितेको रियल मड्रिड यो सिजन पनि उपाधि उचाल्ने दाउमा छ। यो सिजन च्याम्पियन्स लिग फुटबलको क्वाटरफाइनलमै रियल मड्रिडले बलियो प्रतिद्वन्द्वी जर्मन क्लब वार्यन म्युनिखको सामना गर्दैछ।

इस्कोले मार्कासँगको कुराकानीमा भनेका छन्,‘हामी यो सिजन राम्रो खेलिरहेका छौं। हामीसँग यो सिजन ला लिगा र च्याम्पियन्स लिग फुटबल दुवै लिगको उपाधि जित्ने अवसर छ। त्यसका लागि हामीसँग उत्कृष्ट खेलाडीको टोली पनि छ।’ ला लिगा अन्तर्गत रियल मड्रिडले आइतबार डिपोर्टिभो अल्भेसविरुद्ध खेल्दैछ।