अन्नपूर्ण ओएमजीमा उचालिए दर्शक
काठमाडौं : काठमाडौंको मुख्य भागमा रहेको टुँडिखेलमा शनिबार मध्याह्न 'अन्नपूर्ण ओएमजी बम्पर उपहार घोषणा कार्यक्रम' हुँदै थियो । त्यहीबीचमा गुन्द्रुके कपाल हल्लाउँदै मञ्चमा उक्लिए चर्चित गायक प्रमोद खरेल । टुँडिखेलमा जम्मा भएका आगन्तुक र दर्शकलाई उनले एकाएक तताए । गायक खरेललाई चर्चाको शिखरमा पुर्याउने गीत 'मेरो दिल छ पोखरामा' र आम श्रोताको मनमनमा उनलाई बसाउन सफल गीत 'झुमा झुम्कावाली' उनले प्रस्तुत गरे ।
प्रमोदको 'झुमा झुम्कावाली' सुनेर धीत मर्ने कमै युवा होलान् । एकपटक यो गीतमा नाचेर धीत नमरेका दर्शकको 'वान्स मोर' अनुरोधलाई स्वीकार्दै प्रमोदले पुनः 'झुमा झुम्कावाली' गाए । दर्शकमाझ दोस्रोपटक प्रस्तुत गरिँदा पनि दर्शकमाझ उत्तिकै उत्साह देखियो । गर्मीको कुनै परवाह नगरी मनोरञ्जन लिइरहेका दर्शकको बीचमै पुगेर प्रमोद पनि जोशिए । उनले दर्शकलाई नाच्न उत्साही बनाउँदै आफूसँगै गाउनसमेत लगाए । मञ्चबाट ओर्लेर दर्शकदीर्घातिर आउँदै गरेका प्रमोदलाई देखेर दर्शकको उत्साह सम्हाल्न सुरक्षाकर्मीलाई नै हम्मेहम्मे परेको थियो । प्रमोदले शुक्रबारमात्र रिलिज भएको नयाँ गीत 'लाइदेऊ न मायाले'समेत कार्यक्रममा प्रस्तुत गरे । उनको प्रस्तुति शैलीले सयौं दर्शकलाई लोभ्याएको थियो ।
कार्यक्रममा गायक हेमन्त शर्माले 'उकालीमा जाँदाजाँदै', 'मूल हौ भने रसाइदेऊ', 'आउँदै गर मालती', 'थाप न थाप हातैमा', 'गुडेको रेल पनि' बोलका गीत प्रस्तुत गरे । कार्यक्रमको पहिलो प्रस्तुति शर्माकै थियो । उनको प्रस्तुतिले टुँडिखेलको खुला मैदानमा छरिएका दर्शकलाई एकै ढिक्का बनाएको थियो । शर्माको गीतमा मग्न भएका दर्शकलाई प्रमोदले जुरुकजुरुक बनाएका थिए ।
प्रमोदपछि मञ्चमा उक्लेकी गायिका रेखा शाहको गीतले सबै उमेरका दर्शकको मन नजित्ने कुरै भएन । लोकस्वाद सहितको 'सइँको घर काँ हो काँ' बोलको गीतले एकखाले दर्शकको मन फुरुंग भयो । बालबालिकादेखि वृद्धसम्मको ओठमा झुन्डिएको 'सिमसिमे पानीमा' बोलको गीतले सबै दर्शकको मन जित्यो । सुन्दरी गायिका रेखाले मीठो स्वरसँगै नृत्यकला पनि प्रस्तुत गरिन् ।
यी तीनै कलाकारभन्दा फरक शैली र स्वादको गीत लिएर प्रस्तुत भए गायक योगेश्वर अमात्य । बेफिक्रीजस्ता देखिने अमात्यको गायनशैली पनि रमाइलो थियो । आफैं आनन्द लिएर गाउने उनी त्यही शैलीबाट दर्शकको मन जित्छन् । प्रायः भीडभाडमा नदेखिने र सार्वजनिक कार्यक्रममा गीत गाउन त्यति नरुचाउने गायक भएकाले उनको प्रस्तुति हेर्न पाउँदा दर्शक अझ बढी नै हौसिएका थिए । अमात्यले 'जब सन्ध्या हुन्छ' बोलको चर्चित गीत सुनाए।
एकैछिनमा घाम लाग्ने र एकैछिनमा धुम्म भइरहेको शनिबारको आकाश अमात्यले गीत गाउने समयमा साँझ बोकेर आएझैं देखियो । मौसमले सन्ध्याको समय सिर्जना गरिदिएपछि अमात्यको गीतबाट दर्शकले पूर्ण मनोरञ्जन लिए ।
प्रतिक्रिया दिनुहोस !
