स्विट्जरल्यान्डमा नेपाली चलचित्र प्रदर्शन

काठमाडौं : नेपाली चलचित्रलाई अन्तर्राष्ट्रिय बजारमा लैजान महोत्सव एउटा प्रभावकारी माध्यम मानिन्छ । स्तरीय र मौलिक चलचित्र अन्तर्राष्ट्रिय चलचित्र महोत्सवमा सहभागी भए त्यसको प्रभाव र आकर्षण विभिन्न मुलुकका चलचित्रकर्मीमा पुग्नसक्छ । नेपाली चलचित्रले अहिले यस्तै एउटा ऐतिहासिक अवसर पाएको छ स्विट्जरल्यान्डमा । मार्च ३१ देखि स्विट्जरल्यान्डमा सुरु भएको 'फेस्टिभल इन्टरनेसनल डी फिल्मस् फ्रिवर्ग'मा 'न्यु टेरिटरी' विधाअन्तर्गत यस वर्ष डेढ दर्जनभन्दा बढी कथानक एवं लघु चलचित्र प्रदर्शनको अवसर जुरेको हो ।

अप्रिल ९ सम्म चल्ने महोत्सवमा कथानक चलचित्रअन्तर्गत नेपालको पहिलो रंगीन चलचित्र 'कुमारी'सहित 'सिन्दूर', 'वासुदेव', 'कागबेनी', 'नुमाफुङ', 'मुकुण्डो', 'सुनगाभा', 'लुट', 'सेर्दाक', 'कालो पोथी', 'हु विल बी अ गुर्खा', 'सुन्तली', 'हाइवे', 'ह्वाइट सन' (सेतो सूर्य) रहेका छन् । त्यसैगरी लघु चलचित्रतर्फ 'दाद्या', 'झा लो', 'काफल पाक्यो', 'मलामी', 'छोरा' र 'भ्वाइस लेस' रहेका छन् । चलचित्र विकास बोर्डले जारी गरेको विज्ञप्तिअनुसार यी कथानक र लघुचलचित्रले विश्वभरका चलचित्रप्रेमीले नेपाली चलचित्रको स्वाद पाउनुका साथै नेपाल र नेपाली चलचित्रका बारेमा जान्ने अवसर पाउने विश्वास गरिएको छ ।

महोत्सवमा नेपालमा छायांकन गरिएका विदेशी चलचित्रमा हलिउडको 'एभरेस्ट', कोरियाको 'हिमालय', जापानको 'एभरेस्ट–समिट अफ द गड्स', एरिक भ्यालीको वृत्तचित्र 'हिमालयन गोल्ड रस'समेत समावेश गरिएको छ । महोत्सवमा यो अवसरका लागि पहल गरेको चलचित्र विकास बोर्डले दिएको जानकारीअनुसार प्रत्येक नेपाली चलचित्र कम्तीमा दुईपटक प्रदर्शन हुनेछ । महोत्सवमा प्रदर्शन हुने नेपाली चलचित्रलाई अंग्रेजी र फ्रेन्च भाषामा सबटाइटलिङ गरिएको छ ।

महोत्सवमा अन्तर्राष्ट्रिय चलचित्रतर्फ 'फिचर फिल्म' विधामा दीपक रौनियार निर्देशित 'ह्वाइट सन (सेतो सूर्य)' र लघु चलचित्रतर्फ 'झा लो'ले अन्य विदेशी चलचित्रसँग प्रतिस्पर्धा गर्दैछ । महोत्सवमा नेपालका निर्देशक सुवर्ण थापा अन्तर्राष्ट्रिय जुरीमा रहेका छन् । महोत्सवमा समावेश गरिएकामध्ये महत्वपूर्ण सेसन मानिएको नेपाली चलचित्रको विकाससम्बन्धी पब्लिक राउन्ड टेबल डिस्कसनमा नेपालका दीपक रौनियार, सुवर्ण थापा, सेनाङ ग्याम्जो तामाङ, निर्माता रामकृष्ण पोखरेल लगायतको सहभागिता रहनेछ । राउन्ड टेबल डिस्कसन अप्रिल ५ मा हुँदैछ ।

विश्वमा प्रतिष्ठित मानिएको यस महोत्सवमा नेपाली चलचित्रलाई प्राथमिकताका साथ प्रदर्शन गरिनुमा पछिल्लो समय नेपाली चलचित्रले अन्तर्राष्ट्रिय जगत्मा देखाएको उल्लेखनीय प्रशंसा, सम्भाव्यता मुख्य कारक भएको चलचित्र विकास बोर्डले जनाएको छ । यस्ता महोत्सवले एकातिर नेपाली चलचित्रको दायरा फराकिलो बनाउने, अर्कोतिर पर्यटन प्रवद्र्धनका साथै नेपालमा विदेशी चलचित्र छायांकनका लागि उपयुक्त गन्तव्यका रूपमा सन्देश प्रवाह गर्ने विश्वास गरिएको छ ।