उद्योग वाणिज्य महासंघमा १११ जनाको उम्मेदवारी

काठमाडौं : नेपाल उद्योग वाणिज्य महासंघको आसन्न निर्वाचनमा एक सय ११ जनाको उम्मेदवारी परेको छ । वरिष्ठ उपाध्यक्ष, तीन उपाध्यक्ष, कोषाध्यक्ष, कार्यकारिणी सदस्य र प्रदेश सदस्यमा उम्मेदवारी परेको हो । उम्मेदवारी दर्ता गर्ने समय सोमबार साँझ ५ बजेसम्म तोकिएको थियो ।

वरिष्ठ उपाध्यक्षमा शेखर गोल्छा र किशोर प्रधानको उम्मेदवारी परेको छ । गोल्छा र प्रधान प्यानलसहित चुनावी मैदानमा उत्रिएका छन् । निर्वाचन समितिका अनुसार जिल्ला-नगर उद्योग वाणिज्य संघबाट २८, वस्तुगत संघबाट २७, एसोसिएट सदस्यबाट ३१ र द्विराष्ट्रिय संघबाट एक जनाको उम्मेदवारी परेको छ । द्विराष्ट्रिय संघबाट उम्मेदवारी दिएका अजय मुडवरी निर्विरोध चयन भएका छन् ।

वस्तुगततर्फको उपाध्यक्षमा तीन जनाको उम्मेदवारी परेको छ । उमेशलाल प्रधान, शंकरप्रसाद पाण्डे र अनुपबहादुर मल्लले वस्तुगत उपाध्यक्षमा उम्मेदवारी दिएका छन् । उमेशलालको उम्मेदवारी गोल्छा समूहबाट परेको हो भने शंकरको उम्मेदवारी प्रधान समूहबाट परेको हो । अनुपबहादुरले उपाध्यक्षमा स्वतन्त्र उम्मेदवारी दिएका हुन् ।

जिल्ला-नगर उपाध्यक्षमा दुई जनाको उम्मेदवारी परेको छ । गोल्छा समूहबाट दिनेश श्रेष्ठ र प्रधान समूहबाट प्रमोद श्रेष्ठ उम्मेदवार छन् । एसोसिएट उपाध्यक्षमा चन्द्र ढकालको मात्र उम्मेदवारी परेको समितिले जानकारी दिएको छ । एसोसिएट उपाध्यक्षमा ढकाल निर्विरोध चयन हुने भएका छन् । प्रधान समूहले पनि ढकाललाई एसोसिएट उपाध्यक्षमा समर्थन गरेको छ ।

मुलुक संघीय संरचनामा गएपछि महासंघको विधान पनि संघीय संरचनाअनुरुप संशोधन गरिएको छ । नयाँ विधानले प्रत्येक प्रदेशबाट एक-एक जना कार्यकारिणी सदस्य चयन गर्ने व्यवस्थ गरेको छ । प्रदेशतर्फको सदस्यका लागि १ नम्बर प्रदेशमा तीन जना, २ नम्बर प्रदेशमा दुई जना, ३ नम्बर प्रदेशमा एक जना, ४ नम्बर प्रदेशमा दुई जना, ५ नम्बर प्रदेशमा एक जना, ६ नम्बर प्रदेशमा दुई जना र ७ नम्बर प्रदेशमा चार जनाको उम्मेदवारी परेको छ । तीन र पाँच नम्बर प्रदेशबाट एक-एक उम्मेदवारी परेकाले निर्विरोध चयन भएका छन् ।

वरिष्ठ उपाध्यक्ष, तीन उपाध्यक्ष, कोषाध्यक्ष, कार्यकारिणी सदस्य र प्रदेश सदस्यमा उम्मेदवारी परेको हो ।

विधानअनुसार महासंघमा एकजना अध्यक्ष, एकजना वरिष्ठ उपाध्यक्ष, तीनजना उपाध्यक्ष, एकजना कोषाध्यक्ष रहने व्यवस्था छ । एसोसिएटतर्फ १९ जना, वस्तुगततर्फ १४ जना, द्विराष्ट्रियतर्फ एकजना कार्यकारिणी सदस्य निर्वाचित हुनेछन् । जिल्ला-नगरबाट खुलातर्फ १८ जना सदस्य निर्वाचित रहने व्यवस्था छ । यस्तै, जिल्ला-नगरबाटै प्रत्येक प्रदेशको प्रतिनिधित्व हुने गरी सातजना केन्द्रीय कार्यकारिणी सदस्य निर्वाचित हुनेछन् । महासंघको संस्थापक सदस्यमध्येबाट एक जना सदस्य निर्वाचित हुने व्यवस्था छ । महासंघका १३ संस्थापक सदस्यमध्ये मोरङ व्यापार संघका निवर्तमान अध्यक्ष अविनास बोहोराको उम्मेदवारी परेको छ । उनी पनि निर्विरोध कार्यकारिणी सदस्यमा चयन भएका छन् ।

संशोधित संघीय विद्यानअनुसार प्रत्येक प्रदेश (७ प्रदेश) मा एक-एक प्रादेशिक कमिटी गठन गरिनेछ । प्रादेशिक कमिटिका निर्वाचित सात अध्यक्ष केन्द्रीय कार्यकारिणी समितिमा पदेन सदस्य रहने व्यवस्था छ । महासंघको निर्वाचित कार्यकारिणी समितिले पाँच जना सदस्य मनोनयन गर्नेछ ।
नयाँ विधानले वरिष्ठ उपाध्यक्ष स्वतः अध्यक्ष हुने व्यवस्था गरेपछि वरिष्ठ उपाध्यक्षसहित तलका पदमा भिडन्त हुन लागेको हो । वर्तमान कार्यसमितिकी वरिष्ठ उपाध्यक्ष भवानी राणा स्वतः अध्यक्ष चयन हुँदैछिन् । यही चैत २८ र २९ गते हुन लागेको महासंघको ५१ औं वार्षिक साधारणसभाले नयाँ कार्यसमिति चयन गर्न लागेको हो ।

किशोर समूहको उम्मेदवारी दर्ता

काठमाडौं : नेपाल उद्योग वाणिज्य महासंघको आसन्न निर्वाचनमा किशोर समूहले उम्मेदवारी दर्ता गराएको छ । वरिष्ठ उपाध्यक्षसहित दुई उपाध्यक्ष र सदस्यले महासंघ सचिवालयमा उम्मेदवारी दर्ता गराएका हुन् । वरिष्ठ उपाध्यक्षका उम्मेदवार प्रधानको समूहमा जिल्ला-नगर उपाध्यक्षमा प्रमोद श्रेष्ठ र वस्तुगत उपाध्यक्षमा शंकरप्रसाद पाण्डे छन् । किशोर समूहले एसोसिएट उपाध्यक्षमा चन्द्र ढकाललाई समर्थन गरेको छ ।

कोषाध्यक्षमा निर्वाचनपछि उम्मेदवारी खडा गर्ने प्रधान समूहले बतायो । निर्वाचित कार्यकारिणी सदस्यबाट कोषाध्यक्ष चयन गर्ने महासंघको विधानमा व्यवस्था छ । किशोर प्रधान अहिले महासंघमा जिल्ला-नगर उपाध्यक्ष रहेका छन् । शेखर गोल्छा समूहले आइतबार नै उम्मेदवारी दर्ता गराइसकेको छ । यो समूहले मंगलबार राजधानीमा प्यानल घोषणा गर्दैछ । गोल्छा अहिले महासंघमा एसोसिएट उपाध्यक्ष छन् ।