फोहरको दुर्गन्धमा राष्ट्रिय तयारी
काठमाडौं: राष्ट्रिय खेलकुद परिषद् (राखेप)ले वार्षिक कार्यक्रमअनुसार गत फागुन २६ गतेदेखि राष्ट्रिय टिम तयारीका लागि प्रशिक्षण थालेको छ । प्रशिक्षणमा विभिन्न १२ खेलका एक सय ८७ जना खेलाडी सहभागी छन् । अर्को वर्ष आयोजना हुने एसियाली खेलकुद र सन् २०१९ मा नेपालमै आयोजना हुने भनिएको १३औं दक्षिण एसियाली खेलकुद (साग)लाई ध्यानमा राखी पदकको सम्भावना भएका १२ वटा एकल खेललाई प्रशिक्षणमा समावेश गरिएको हो ।
राष्ट्रिय टिम तयारीमा समावेश गरिएका अधिकांश खेलको प्रशिक्षण त्रिपुरेश्वरस्थित दशरथ रंगशालामा भइरहेको छ । गत वर्ष गएको विनाशकारी भूकम्पले क्षतिग्रस्त बनेको रंगशालाको भीआईपी प्यारापिटतर्फ बक्सिङ, तेक्वान्दो, उसु, जुडो, कराँतेलगायतका खेलको प्रशिक्षण भइरहेको छ । एकातिर भौतिक संरचनाका दृष्टिले जोखिमपूर्ण र अर्कोतिर फोहोर र दुर्गन्ध । कुनै पनि दृष्टिले रंगशाला तालिमका लागि उपयुक्त देखिँदैन । तर ठाउँको अभावका कारण राखेपले त्यही जीर्ण, जोखिमपूर्ण र दुर्गन्धित ठाउँमा राष्ट्रिय टिम तयारी गरिरहेको छ ।
दशरथ रंगशालाको मूल गेटदेखि नै जताततै फोहरको डुंगुर छ । गेटबाट बायाँतिरको स्थिति झन् भयावह देखिन्छ । तालिम हलमा जाने भर्याङभरि फोहरैफोहर छन् । अझ शौचालयको चर्को दुर्गन्धले त्यहाँभित्र छिर्ने जोकोहीलाई पनि हाम्मे पर्छ । १२औं सागमा स्वर्ण पदक विजेता जुडो खेलाडी फुपूल्हामु खत्री रंगशालाको अवस्था भयावह रहेको बताउँछिन् । ‘ट्वाइलेट साह्रै फोहर छ, भित्रमा जाँदा नाक र मुख छोपेर जानुपर्छ । रंगशालाको यस्तो बेहाल हुँदाहुँदै पनि सम्बन्धित निकायले ध्यान नदिएकोमा अचम्म लागेको छ’, खत्रीले अन्नपूर्ण पोस्ट्सँग भनिन् । उनले शौचालयको चर्को दुर्गन्धले खेलाडीको तयारीमा समेत असर पारेको गुनासो गरिन् ।
यसैगरी तेक्वान्दोका प्रशिक्षक आयशा शाक्य पनि प्रशिक्षण स्थलको अवस्था निकै दयनीय रहेको बताउँछिन् । ‘परिषद्का कर्मचारीले काम नगरिदिँदा रंगशालाको दुर्गति भएको हो । अर्को कुरा तालिमका लागि रंगशालाबाहेक अरू स्थान छैन । भूकम्पले क्षतिग्रस्त भए पनि हामी कम्प्रोमाइज गरेर त्यही ठाउँमा तालिम गर्न बाध्य छौं’, उनले भनिन्, ‘एक त खेलाडीको स्वास्थ्यका लागि पनि त्यो ठाउँ उपयुक्त छैन । यस्तो ठाउँमा तालिम गर्दा नरमाइलो त लाग्छ तर विकल्प नै नभएपछि के गर्ने ? ’ सागकी स्वर्ण पदक विजेतासमेत रहेकी शाक्य बाध्यता सुनाउँछिन् ।
राखेपका सदस्यसचिव केशवकुमार विष्टले भूकम्पले क्षतिग्रस्त बनेको भीआईपी प्यारापिट भत्काउनुपर्ने भएकाले मर्मतसम्भार र सफासुग्धरमा बढी ध्यान दिन नसकिएको स्वीकारे । ‘भीआईपी प्यारापिट र भवन भूकम्पले क्षतिग्रस्त बनेको छ, त्यसलाई भत्काउनुपर्ने भएको छ । बोरिङ गरिएको पानी पनि सुकेको छ । त्यसैले पनि मर्मतसम्भार र सरसफाइमा ध्यान दिन नसकिएको हो’, उने भने । सदस्यसचिव विष्टले रंगशालामा हुँदै आएको प्रशिक्षण केही दिनभित्रै अन्यत्र सारिने बताए ।
राष्ट्रिय टिम तयारी समितिका संयोजक रिम रानाभाटले भौतिक पूर्वाधारको अभावमा बाध्यतावश रंगशालामा तालिम गराउनु परेको बताए । ‘खेलाडीबाट गुनासो आएपछि हामीले सरसफाइका लागि सामान्य प्रशासनमा पत्राचार गरेका छौं तर भत्काउनुपर्ने संरचना भएकाले त्यति ध्यान दिइएको छैन’, संयोजक रानाभटले भने । यसपटक १२औं साग र सातौं राष्ट्रिय खेलकुद प्रतियोगितामा स्वर्ण पदक विजेता खेलाडीलाई राष्ट्रिय तयारी टिममा सहभागी गराइएको छ । सहभागी खेलमा तेक्वान्दो, कराँते, बक्सिङ, उसु, जुडो, एथलेटिक्स, आर्चरी, ब्याडमिन्टन, टेबुलटेनिस, सुटिङ, भारोत्तोलन र कुस्ती रहेका छन् । यसैगरी पौडी र ट्रायथलनको प्रशिक्षण पनि चाँडै सुरु हुने राखेपले जनाएको छ ।
प्रतिक्रिया दिनुहोस !
