पर्यटक तान्दै कास्कीको कफुचे हिमताल

पोखरा : कास्कीको मादी गाउँपालिकास्थित देशकै कान्छो कफुचे हिमताल अवलोकन गर्ने आन्तरिक तथा बाह्य पर्यटकको संख्या बढ्दै गएको छ । समुद्री सतहदेखि २४ सय ३७ मिटर उचाइमा हिमताल रहेको छ ।

अन्नपूर्ण चौथो र अन्नपूर्ण दोस्रो हिमालको बीचमा जम्मा भएको हिउँको थुप्रो हिमपहिरोका रूपमा खसेर जम्मा भएको हिउँ १४ वर्षको अवधिमा पग्लिएर हिमताल बनेको पार्चे गाविसका पूर्वअध्यक्ष मानबहादुर गुरुङले बताए । यसअघि स्थानीय भेडा चराउँदा हिउँको थुप्रो भएरै आउजाउ गर्थे । १४ वर्षदेखि हिउँको थुप्रो पग्लिएर ताल बनेको उनले सुनाए । नेपालकै कान्छो र सबैभन्दा कम उचाइमा रहेको हिमताल अवलोकन गर्ने पदयात्री पछिल्लो समय बढेका हुन् ।

पर्यटकीय गाउँ सिक्लेसबाट ७ घन्टाको पैदल यात्रा गरी हुँगु हँदै कफुचे तालसम्म पुग्न सकिने उनले सुनाए । पोखराबाट ताल करिब ५१ किलोमिटर दूरीमा छ । सिक्लेस पोखरादेखि ३९ किलोमिटर दूरीमा पर्छ । कम उचाइमा बनेको नयाँ हिमताल अवलोकन गर्न पछिल्लो समय नेपाली युवा, विद्यार्थी, विदेशी पदयात्री बढी आकर्षित भएको स्थानीय पर्यटन व्यवसायी इमान गुरुङले जानकारी दिए ।

अन्नपूर्ण संरक्षण क्षेत्र आयोजना (एक्याप) का अनुसार सिक्लेसमा सन् २०१५ मा ४ हजार ४ सय ५६ पर्यटक पुगेकोमा सन् २०१६ मा पर्यटकको संख्या बढेर ७ हजार २ सय २ पर्यटक सिक्लेस पुगेको अन्नपूर्ण संरक्षण क्षेत्र आयोजना (एक्याप) की पर्यटन अधिकृत रश्मि आचार्यले बताइन् । नेपाली पर्यटक कति पुगे भन्ने तथ्यांक राख्ने चलन नभएको र अबदेखि आन्तरिक पर्यटकको पनि तथ्यांक राखिने उनले सुनाइन् । सन् २०१७ मा पनि सिक्लेस हँदै कफुचे तालसम्म जाने पर्यटकको संख्या पनि बढेको उनले जनकारी दिइन् । अन्नपूर्ण संरक्षण क्षेत्र (एक्याप) मा पर्ने यो ताल पुग्न पर्यटकीय गाउँ सिक्लेसबाट दुई दिनको पैदल यात्रा तय गर्नुपर्छ ।

ग्लोबलवामिङको कारण ग्ल्यासियर पग्लिएर बनेको कान्छो हिमतालको सरकारले संरक्षण गर्दै पर्यटन प्रवद्र्धन गर्न सके कास्की नेपालकै पर्यटन विकासमा टेवा पुग्ने भूगोलविद् डा. कृष्ण केसीले बताए । समुद्री सतहदेखि करिब आठ हजार मिटर उचाइका अन्नपूर्ण दोस्रो र चौथो हिमालबाट २५ सय मिटर तल हिमपहिरो खसेर बनेको यो ताल विश्वकै लागि उनौठो हुने उनले सुनाए ।

कम उचाइमा रहेको हिमतालको विश्व पर्यटन बजारमा प्रवद्र्धनात्मक कार्यक्रम गर्नुपर्ने उनले जोड दिए । पर्यटकको बसाइ लम्ब्याउन मानवनिर्मित नयाँ पर्यटकीय गन्तव्य बनाउनुपर्नेमा प्रकृतिले नै सिर्जना गरेका नयाँ पर्यटकीय गन्तव्यको संरक्षण गर्दै पर्यटन प्रवद्र्धन गर्न सरकार र निजी क्षेत्र लाग्नुपर्ने डा. केसीले सुझाए ।

नयाँ हिमतालको प्रवद्र्धनका लागि अन्नपूर्ण संरक्षण क्षेत्र आयोजनाले पदयात्रा मार्गको स्तरोन्नतिसमेत गरेको एक्यापकी पर्यटन अधिकृत आचार्यले जानकारी दिइन् । भेडा गोठाला हिँडिरहेको पुरानै गोरेटोलाई स्तरोन्नति गरी पदयात्रा मार्ग निर्माण गरिएको पर्यटन अधिकृत उनले बताइन् । यस वर्ष १ लाख ६१ हजार लागतमा पदयात्रा मार्ग सुधार गरिएको एक्याप सिक्लेसले बताएको छ ।

लालीगुराँसको वन हँदै उकाली-ओराली गर्दै अन्नपूर्ण, लम्जुङलगायत सुन्दर हिमशृंखला दृश्यावलोकन गर्न सकिने यस क्षेत्र वन्यजन्तु, जडीबुटीका लागि पनि प्रसिद्ध रहेको स्थानीय व्यवसायी प्रकाश गुरुङले बताए । पर्यटकीय गन्तव्यको आकर्षक पक्ष नेपालकै कम उचाइमा रहेको हिमतालको अवलोकनको साथै यस क्षेत्रका संस्कृतिक, प्राकृतिक विविधता र भेडागोठको बसाइको आनन्द लिन सकिने गुरुङले सुनाए । हिमताल हेर्न आउने बढेपछि १५ जनासम्म बस्न मिल्ने गरी कटेजसमेत सञ्चालनमा आएको गुरुङले बताए।

सरकारले चासो नदिँदा हिमतालको संरक्षण र पर्यटन प्रवद्र्धनका काम हुन नसकेको पार्चे गाविसका पूर्वअध्यक्ष मानबहादुर गुरुङले बताए । 'तालसम्म जान बाटो छैन,' उनले भने, 'गोठका किसानले हिँड्न मुढा तेस्र्याएर बनाएको पुलबाट हिँड्नुपर्ने अवस्था रहेको उनले सुनाए । वर्षामा त्यही पनि बाढीले लगिदिने भएकाले तालसम्म पुग्ने बाटै बन्द हुन्छ ।' यस क्षेत्रलाई पर्यटकीय केन्द्रका रूपमा विकास गर्न तालसम्म पुग्ने बाटो र तीन ठाउँमा झोलुंगे पुल तत्काल बनाउनुपर्ने उनले बताए । कात्तिकदेखि जेठसम्म यस तालमा जान सकिने उनले जानकारी दिए ।

हिमताल उत्तर-दक्षिण लम्बाई ४ सय ५ मिटर, चौडाइ ३ सय २ मिटर र गहिराइ ३७ मिटर रहेको अध्ययन टोलीमा सहभागी अध्ययन टोलीमा सहभागी पृथ्वीनारायण क्याम्पस भूगोल विभागका उपप्राध्यापक रामजी पोखरेलले बताए । तीन वर्षअघि २०१४ मा जापानी अनुसन्धानकर्ता डा. जिरो कोमोरीले गरेको अध्ययनमा तालको लम्बाइ ४ सय मिटर, चौडाइ ३ सय मिटर र गहिराइ ४० मिटर रहेको बताइएको थियो ।