भेनेजुयला प्रदर्शनमा विद्यार्थी मारिए
काराकासः भेनेजयुलामा भएको प्रदर्शनका क्रममा प्रहरीको गोली लागेर एकजना विद्यार्थीको मृत्यु भएको छ । राष्ट्रपति निकोलस मादुरोका विरुद्धमा गरिएको प्रदर्शनका क्रममा मंगलबार प्रदर्शनकारी र प्रहरीबीच झडपभएपछि प्रहरीले गोली चलाएको थियो ।
प्रदर्शनकारी डानियल क्विेलिजलाई मंगलबार बिहानै भालेन्सिया सहरमा गोली लागेको प्रदर्शनकारीले जानकारी दिएका छन् । राष्ट्रपतिका विरुद्ध भएको प्रदर्शनका क्रममा एक सातामा अहिलेसम्म दुईजनाको मृत्यु भइसकेको छ । १९ वर्षीय आन्दोनलकारी जैरो अर्टिजको पनि बिहीबार प्रहरीको गोली लागी मृत्यु भएको थियो ।
हत्याको आशंका गरिएका एकजना प्रहरीलाई छानबिन सुरु गरिएको सरकारी अधिकारीहरूले जनाएका छन् । राष्ट्रपति मादुरोलाई पदबाट हटाउन माग गर्दै भेनेजुयलामा केही सातादेखि आन्दोलन भइरहेको छ । राष्ट्रपति मादुरोले देशलाई आर्थिक र राजनीतिक संकटमा झन् झन् फसाउँदै लगेको प्रदर्शनकारीले आरोप लगाएका छन् ।
सोमबार भएको प्रदर्शनमा अरू ४० जनालाई हिंसात्मक गतिविधि गरेको अभियोगमा गिरफ्तार गरिएको छ । भेनेजुयलामा सोमबार पाँचौं दिनको झडप हो । भेनेजुयलामा गत केही सातामा भएका ठूला प्रदर्शनहरूमध्येको गत शनिबार भएको प्रदर्शनमा पनि प्रहरी र प्रदर्शनकारीबीच झडप भएको थियो ।
राष्ट्रपति निकोलस मादुरो र उनको सरकारविरुद्ध भएको प्रदर्शनमा प्रहरीले प्रदर्शनकारीलाई नियन्त्रण गर्न अ श्रुग्याँस समेत प्रहार गरेको थियो । विपक्षी दलका नेता हेनरिक काप्रिलेसलाई १५ वर्षसम्म राजनीति गर्न रोक लगाउने सरकारको निर्णयप्रति आक्रोशित भएकाहरूले बृहत् र्याली सहित प्रदर्शन गरेका हुन् । प्रदर्शनमा झण्डै ४ हजार सर्वसाधरण सहभागी थिए ।
भेनेजुयलाको समाजवादी आन्दोलनका पिता मानिने ह्युगो चाभेजको निधनपछि शक्तिमा आएका मादुरोसँग काप्रिलेस सन् २०१३ मा भएको राष्ट्रपतीय निर्वाचनमा झिनो मतान्तरले पराजित भएका थिए ।
मादुरोको सरकारले केही दिनपूर्व ४४ वर्षीय काप्रिलेसलाई आगामी वर्ष आमनिर्वाचन हुन लागिरहेका बेला १५ वर्षे प्रतिबन्धको घोषणा गरेको थियो ।
घोषणासँगै सुरु भएको प्रदर्शन थप चर्को र बृहत् हुँदै गएको प्रदर्शनकारीले जनाएका छन् । —रासस÷एएफपी
प्रतिक्रिया दिनुहोस !
