नेपाल आइडल आजदेखि
काठमाडौंः संगीतप्रेमी दर्शक श्रोताको व्यग्रप्रतीक्षा अब अन्त्य हुने भएको छ । बहुप्रतीक्षित संगीत रियालिटी शो ‘नेपाल आइडल' शुक्रबारदेखि एपी वन टेलिभिजनमा प्रसारण हुने भएको छ ।
पहिलो कार्यक्रम शुक्रबार राति ८ः४५ बजे प्रसारण हुनेछ । हरेक हप्ता बिहीबार र शुक्रबार नेपाल आइडल सोहि समयमा प्रशारण हुनेछ । कार्यक्रमका अरु गतिविधि समेटिएको नेपाल आइडल एक्स्ट्रा बुधबार राती ८ः४५ मा प्रसारण हुनेछ । कार्यक्रम सुरु हुनुपूर्व नै यू ट्युबमा लाखौं दर्शकले यसको प्रोमो हेरिसकेका छन् ।
नेपाल आइडल विजेताले पाउने २० लाख रुपैयाँ, १५ लाख रुपैयाँबराबरको सांगीतिक एल्बम र ३१ लाख ४५ हजार मूल्यबराबरको गाडीले यसको आकर्षण बढेको छ । यति ठूलो पुरस्कार राशि दिने नेपाली रियालिटी शो नेपाल आइडलमात्र हो । फ्रेन्चाइज लिएर नेपालमा सञ्चालन गरिएको पनि यो पहिलो कार्यक्रम हो । यसमा केवल गायनमात्र नभई प्रतियोगीको पारिवारिक पृष्ठभूमि र भावनात्मक पक्ष पनि देखाइन्छ । विश्वका ५० भन्दा बढि देशमा लोकप्रिय भइसकेको यस कार्यक्रमले दर्शकलाई भावनात्मक रूपमा कार्यक्रमसँग जोड्ने विश्वास लिइएको छ ।
कार्यक्रमको कुल ३२ वटा शृंखला प्रस्तुत हुनेछन् । प्रतियोगिताको निर्णायकमा न्ह्यु वज्राचार्य, इन्दिरा जोशी र कालीप्रसाद बाँस्कोटा रहेका छन् । सुशील नेपाल र रीमा विश्वकर्माले कार्यक्रम प्रस्तुत गर्नेछन् । नेपालगन्ज, बुटवल, नारायणगढ, वीरगन्ज, विराटनगर, पोखरा र काठमाडौंमा आइडलको अडिसन भएको थियो ।
प्रतिक्रिया दिनुहोस !
