नयाँ वर्षमा नम्बर वान भिडन्त
काठमाडौंः नयाँ वर्षको अवसर पारेर शुक्रबार तीनवटा नेपाली कथानक चलचित्र देशभर एकसाथ रिलिज भएको छ । दीपेन्द्र के खनाल निर्देशित ‘लभ लभ लभ', दीपेन्द्र लामा निर्देशित ‘घामपानी' र जगदीश्वर थापा निर्देशित ‘राधे' दर्शकमाझ आएका हुन् । यी तीन चलचित्रबीचको प्रतिस्पर्धा निकै रोचक र चलचित्र क्षेत्रमा चासोको विषय बनेको छ । तीनवटै चलचित्रले राम्रो ‘हाइप' पाउनुका साथै आआफ्नै महत्व बोकेकाले धेरैको ध्यान खिचेको हो ।
वर्ष २०७३ मा ‘पशुपतिप्रसाद'जस्तो सफल चलचित्र दिएका दीपेन्द्र के खनाल सफल र दर्शकको रुचि बुझ्नसक्ने निर्देशक मानिन्छन् । अन्य चलचित्रको सामना गर्न उनमा आत्मविश्वास पनि देखिएको छ । युवापुस्तालाई आकर्षित गर्नसक्ने आकलन गरिएको चलचित्र ‘लभ लभ लभ'बाट उनी ‘पशुपतिप्रसाद'को सफलता दोहोर्याउने दाउमा छन् । यस चलचित्रमा सुरज पाण्डे, स्वस्तिमा खड्का, रमेश बुढाथोकी, देशभक्त खनाल, रूपा राना, आयन खड्का, गणेश मुनाल, लक्ष्मी भुसाल, शारदा गिरीलगायतले अभिनय गरेका छन् ।
वर्ष २०७३ मा नम्बर वान अभिनेता अभिनेत्रीका रूपमा आफूलाई उभ्याएका दयाहाङ राई र प्रियंका कार्कीबीच नयाँ वर्षको सुरुमै प्रतिस्पर्धा देखिएको छ । धेरै चलचित्रमा एकसाथ अभिनय गरेका उनीहरू यसपटक फरकफरक चलचित्रका साथ दर्शकमाझ आएका हुन् ।
त्रिपक्षीय प्रतिस्पर्धामा पाखुरा सुर्केरै आएका छन् निर्देशक दीपेन्द्र लामा पनि । चलचित्र समीक्षाबाट ख्याति कमाएका सञ्चारकर्मी लामा चलचित्रको भित्री गुदी थाहा पाउनसक्ने व्यक्ति मानिन्छन् । आफ्नो डेब्यु निर्देशन भएकाले मेहनत पनि त्यत्तिकै गरेका छन् । पहिलो चलचित्रबाटै सफलताको स्वाद चाख्न लालायित लामा भन्छन्, ‘घामपानीको विषयवस्तुले नै दर्शकलाई आकर्षित गरेको छ ।' प्रेमकथाभित्र जातीय मेलमिलाप, अरूको संस्कृतिलाई सम्मान गर्नुपर्छ भन्ने सन्देश रहेको यो चलचित्रमा दयाहाङ राई, केकी अधिकारी, अंकित खड्का, बुद्धि तामाङ, कविता आले, पुष्कर गुरुङ, सिल्सा जिरेल, प्रकाश घिमिरे आदिको अभिनय छ । यो चलचित्र उपत्यका र मोफसलका ७० भन्दा बढी हलमा लागेको छ ।
चलचित्र ‘राधे' पनि आर्कमक प्रचार अभियानका साथ पर्दामा उक्लिएको छ । अहिलेकी नम्बर वान मानिने नायिका प्रियंका कार्की र निखिल उप्रेतीले पहिलोपटक अभिनय गरेको यो चलचित्रप्रति पनि दर्शकको आकर्षण देखिन्छ । वर्ष २०७३ मा दर्शकमाझ आएको किङ, निर्भयजस्ता चलचित्रले खासै दर्शक तान्न नसकेका कारण यस चलचित्रमार्फत आफ्नो ‘स्टारडम' देखिने अपेक्षा गरेका छन् निखिलले ।
लामो समयको अन्तरालपछि आफैले निर्देशन गरेको चलचित्र भैरवबाट कमब्याक गरेका निखिल अभिनीत चलचित्रले प्रभावकारी व्यवसाय गर्न नसके पनि उनीप्रतिको आकर्षण भने घटेको छैन । त्यसमाथि राधेमा प्रियंकासँगको सहकार्य । साथमा आशिष्मा नकर्मी, प्रमोद अग्रहरि, शिशिर भण्डारी, सलोन बस्नेतले पनि यस चलचित्रमा अभिनय गरेका छन् ।
अर्को रोचक प्रसंग के छ भने वर्ष २०७३ मा नम्बर वान अभिनेता अभिनेत्रीका रूपमा आफूलाई उभ्याएका दयाहाङ राई र प्रियंका कार्कीबीच नयाँ वर्षको सुरुमै प्रतिस्पर्धा चलेको छ । धेरै चलचित्रमा एकसाथ अभिनय गरेका उनीहरू यस पटक फरकफरक चलचित्रका साथ दर्शकमाझ आएका हुन् । वर्ष २०७३ मा छक्का पन्जाजस्तो ‘ब्लकबस्टर' चलचित्र दिएकी प्रियंका यसै पनि अहिले दर्शकले रुचाएकी नायिका हुन् भने दयाहाङ अझै पनि हटकेक मानिन्छन् । उनले वर्ष २०७३ मा लुट २, वीरविक्रमजस्ता सफल चलचित्र दिएका छन् । दयाहाङको घामपानी र प्रियंकाको राधेले उनीहरूको यो वर्षको संकेत पनि गर्नेछ ।
प्रतिक्रिया दिनुहोस !
