स्थानीय चुनावमा कांग्रेस र माओवादीको गठबन्धन
बेनी : नेपाली कांग्रेस र नेकपा (माओवादी केन्द्र) बीच म्याग्दीमा चुनावी गठबन्धन बनेको छ। वैशाख ३१ गते घोषित स्थानीय तहको निर्वाचनमा ६ मध्ये चार तहमा चुनावी तालमेल गर्ने सहमति दुई दलका बीचमा भएको छ।
रघुगंगा गाउँपालिकामा केन्द्र विवादका कारण चुनावी गतिविधी अघि बढ्न सकेको छैन भने मालिकामा स्थानीय कार्यकर्तासँग थप छलफलपछि तालमेलको टुंगो लाग्नेछ।
कांग्रेस र माओवादीले गठन गरेको उच्च स्तरीय वार्ता टोलीले बेनी नगरपालिका र अन्नपूर्ण गाउँपालिकामा कांग्रेसले प्रमुख, माओवादीले उपप्रमुख र धवलागिरी तथा मंगला गाउँपालिकामा माओवादीले प्रमुख तथा कांग्रेसले उपप्रमुख पाउने सहमति गरेका छन्।
नेपाली कांग्रेसका निवर्तमान सभापति एवं सांसद रेशम बानियाँले सहमति अनुसार चार तहमा साझा उम्मेद्वार हुने बताउनु भयो। कांग्रेसले बेनी नगरपालिकाको मेयरमा पार्टी सचिव हरिकुमार श्रेष्ठलाई सर्वसम्मत रुपमा उम्मेद्वार बनाएको छ भने माओवादी केन्द्रले उपमेयरमा युवा नेृत ज्योती लामिछानेलाई उठाएको छ।
अन्नपूर्ण गाउँपालिकामा कांग्रेसको तर्फबाट डमबहादुर पुन चुनावी मैदानमा हुनुहुन्छ भने माओवादी केन्द्रले उपप्रमुखको टुंगो लगाएको छैन्। माओवादीले धवलागिरीमा खुमनाथ अधिकारी र मंगलामा चन्द्रप्रसाद बुढाथोकीलाई उम्मेद्वार बनाएको छ भने कांग्रेस दुबै ठाउँमा उम्मेद्वारको टुँगो लगाउन बाँकी छ।
‘प्रमुख पुरुष हुने ठाउँमा उपप्रमुख महिलालाई बनाउनुपर्ने भएकाले हामीले एकदुई दिनमै उम्मेद्वार टुंगो लगाउँछौँ’ सांसद् बानियाँले भन्नुभयो, ‘केन्द्रमा पनि दुई पार्टीको गठबन्धन छ, यसले स्थानीयस्तरमा पनि सहमति गर्न मद्दत पुग्यो।’
माओवादी केन्द्रका पोलिटव्युरो सदस्य गोविन्द पौडेलले चार स्थानीय तह प्रमुख र उपप्रमुखमा तालमेल गरी चुनाव लड्ने सहमति भएपनि वडामा भने स्थानीय कार्यकर्ताहरु बीच नै आपसी समझदारी गर्ने भद्र सहमति गरेको बताउनु भयो। ‘अब हामीले हाम्रो गठबन्धनमा राप्रपालाई पनि ल्याउन वार्तालाई तीब्रता दिएका छौँ’, पौडेलले भन्नुभयो। म्याग्दीका ६ स्थानीय तहमा ७३ हजार ४७३ मतदाता रहेका छन्।
प्रतिक्रिया दिनुहोस !
