पेरिस : फ्रान्सको राष्ट्रपतिको निर्वाचन अभियानका भाषण दिइहेका बेला मञ्चमा बेहोस बनी ढलेकी समाजवादी दलका सांसदको रिन एर्हेलको शनिबार निधन भएको छ । राष्ट्रपतिका उम्मेदवार इम्यानुयल म्याक्रोँलाई मतदान गर्न सर्वसाधारण फ्रान्सेली नागरिकलाई मञ्चबाट आकर्षक वक्तव्य दिइरहेका बेला एर्हेल मञ्चमा ढलेपछि तत्कालै उपचारका लागि अस्पताल पुर्याइँदा अस्पतालले उनलाई मृत घोषणा गरेको थियो ।
'राष्ट्रपति निर्वाचनमा सशक्त रूपमा खटिनुभएकी ५० वर्षीय एर्हेलको अभियानका क्रममा मृत्यु भएको खबरले हामीलाई मर्माहत तुल्याएको छ', फ्रान्सको तल्लो सभाका सभामुख क्लाउनड बार्तोलनले भने । बार्तोलनका अनुसार उनी प्लाओजीमा निर्वाचन अभियानका क्रममा खटिएकी थिइन् । 'सन् २००७ देखि फ्रान्सको सांसद रहेकी उहाँ संसदीय क्रियाकलापमा सधैँ लगनशील देखिनुहुन्थ्यो', समाजवादी नेता तथा राष्ट्रपति फ्रास्वाँ ओलँदले मृतक सांसदको स्मरण गरे ।
एर्हेल म्याक्रोँको निर्वाचन अभियानमा सक्रिय रूपमा लागेकी थिइन् । फ्रान्समा राष्ट्रपति निर्वाचनका लागि दोस्रो चरणको निर्वाचन आइतबार हुने कार्यक्रम छ। -रासस/एएफपी
प्रतिक्रिया दिनुहोस !
