फ्रान्सले पायो हालसम्मकै कान्छा राष्ट्रपति

एजेन्सी : फ्रान्सको राष्ट्रपति चयनका लागि आइतबार भएको दोश्रो चरणको मतदानमा पूर्व अर्थ मन्त्री समेत रहनुभएका एम्यानुएल माक्रोन फ्रान्सको नयाँ राष्ट्रपतिको रुपमा विजयी हुनु भएको छ । उहाँ आफ्नी प्रतिद्वन्द्वी मारिन ल पेनलाई ठूलो मतान्तरले हराउँन सफल हुनुभयो । माक्रोनले झण्डै ६५ प्रतिशत मत प्राप्त गर्नु भयो भने उहाँकी प्रतिद्वन्द्वी मारिन ल पेनले करीब ३५ प्रतिशत मात्रै मत पाउनुभयो ।

३९ वर्षीय माक्रोनले फ्रान्सको सबैभन्दा कान्छा राष्ट्रपतिको इतिहास रच्नु भएको छ । माक्रोनलाई फ्रान्समा त्यति नचिनिएको उम्मेदवारको रुपमा लिइन्थ्यो । फ्रान्सको राष्ट्रपतिमा निर्वाचित हुनका लागि ५० प्रतिशत भन्दाबढी मत ल्याउनु पर्ने व्यवस्था छ । गत २३ अप्रिलमा भएको पहिलो चरणको निर्वाचनमा कसैले पनि ५० प्रतिशत भन्दाबढी मत नल्याएपछि सबैभन्दा बढी मत प्राप्त गर्ने माक्रोन र पेनले दोस्रो चरणको निर्वाचनमा प्रतिस्पर्धा गरेका थिए 

'एन मार्के' पार्टीका उम्मेदवार माक्रोन नयाँ राजनीतिक मूल्य मान्यता बोकेका मध्यपन्थी विचारधाराको पक्षधर हुनुहुन्छ भने 'नेशनल फ्रन्ट' पार्टीकी मारिन ल पेन कट्टर दक्षिणपन्थी नेतृ हुनुहुन्छ । सन २००६ देखि २००९ सम्म सोसलिस्ट पार्टीको सदस्य रहनु भएका माक्रोनले एक बर्ष अगाडि (६ अप्रिल २०१६) मात्रै ‘एन मार्के’ नामको नयाँ पार्टी स्थापना गर्नु भएको थियो । चुनावी परिणामपछि माक्रोनका हजारौँ समर्थकले खुशी मनाउँदै देशको झण्डा फहराउँदै पेरिसलगायत विभिन्न सहरमा विजय जुलुस निकालेका छन् । माक्रोनलाई युरोप लगायत विभिन्न राष्ट्रका राष्ट्रप्रमुख तथा नेताहरुले बधाई दिएका छन् ।

पेनले आफू विजयी भएमा फ्रान्सलाई युरोपियन युनियनबाट अलग गर्ने घोषणा गर्नु भएको थियो भने माक्रोन फ्रान्स युरोपियन युनियनमा रहनु पर्ने पक्षमा हुनुहुन्थ्यो । माक्रोनको विजयलाई फ्रान्सेली जनताले युरोपको एकताको पक्षमा मत जाहेर गरेको अर्थमा हेरिएको छ । निर्वाचनमा पराजित मारिन ला पेनले टेलिफोनमार्फत माक्रोनलाई बधाइ दिनुभएको छ । आफूलाई मतदान गर्ने मतदातालाई धन्यवाद दिँदै पेनले आफ्नो दल नेशनल फ्रन्ट पार्टी बलियो प्रतिपक्षीको रुपमा रहने बताउनु भएको छ ।