प्रिमियर सोको रकम विद्यार्थीलाई
काठमाडौं : आगामी मे १४ मा जापानको नाकानो जिरो हलमा नेपाली चलचित्र ‘सायद २' देखाइने भएको छ । चलचित्रको प्रिमियर सो जापानमा देखाइन लागेको निर्माण पक्षले जनाएको छ । प्रिमियर सोका लागि चलचित्रका निर्माता सुनील रावल र नायक सुशील श्रेष्ठसहितको टिम जापान पुगेको छ ।
उनीहरू मंगलबार बिहान जापान पुगेका हुन् । युवाहरूको कथालाई टिपेर बनाइएको चलचित्र ‘सायद २' नेपालमा भने असार ३० गते प्रदर्शन गरिनेछ । चलचित्रका अर्का निर्माता जापानमै व्यवसाय गर्दै आएको ईश्वर श्रेष्ठ हुन् । उनले प्रिमियर सोको सम्पूर्ण तयारी पूरा गरेको जनाएका छन् ।
चलचित्र प्रदर्शनबाट उठेको रकम जापानमै रहेर अध्ययन गरिरहेका नेपालको सुदूरपश्चिमका जेहेनदार विद्यार्थीलाई छात्रवृत्ति उपलब्ध गराइने निर्माता श्रेष्ठले जानकारी दिए । दुर्गिम फिल्मस्को ब्यानरमा बनेको चलचित्रमा सुशील श्रेष्ठ, सरोन श्रेष्ठ, अमृता ढुंगाना, निशा कार्की, रुविना कार्कीलगायतले अभिनय गरेका छन् ।
प्रतिक्रिया दिनुहोस !
