गरिब बच्चासँग जस्टिन बिबर

एजेन्सी : कन्सर्टका क्रममा भारत भ्रमणमा आइपुगेका हलिउड पपगायक जस्टिन बिबरले भारतका गरिब बच्चाहरूलाई भेटेका छन् । बुधबार भारतको डिबाई पाटिल स्टेडियममा उपस्थित भएका उनको बच्चाहरूका साथ रमाएको तस्बिर र भिडियो सामाजिक सञ्जालमा भाइरल भएको छ ।जस्टिनले बालबालिकासँग भेटेर निकै खुसी लागेको र उनीहरू एकदमै असल अनि ज्ञानी भएको भन्दै प्रशंसासमेत गरेका थिए । धेरै पहिलादेखि भारत आउने हल्ला चलेका बिबर मंगलबार राति चार्टर फ्लाइटमार्फत आफ्नो सांगीतिक समूहसहित मुम्बई एयरपोर्ट आइपुगेका थिए ।

परपोज वल्र्ड टुरको क्रममा ६ मे का दिन दुबईमा प्रस्तुति दिएका जस्टिन त्यसपछि भारत आएका हुन् । उनको कार्यक्रममा ह्यारी पोर्टरकी नायिका एलारिका जोनसनले कार्यक्रम होस्ट गरेकी थिइन् । कार्यक्रममा डिबाई पाटिल स्टेडियममा ४५ हजार दर्शक उपस्थित थिए ।

बिबरको सुरक्षाका लागि पाँच सय प्रहरीसहित २५ जना अफिसर खटिएका थिए । उनको कन्सर्ट ड्रोन क्यामराले निगरानी गरिएको थियो । उनका लागि सलमान खानको सेक्युरिटी गार्ड सेरा पनि उपस्थित भएका थिए । दुई दिनका लागि भारत आएका उनी आग्रा, जयपुर, नयाँदिल्लीमा समय बिताउनेछन् । उनले कन्सर्टपछि पार्टीको समेत आयोजना गरेका थिए । कन्सर्टमा एक लिटर पानी सय रुपैयाँ र एउटा चिप्सको एक सय ५० रुपैयाँमा बिक्री भएको थियो।