नौ प्रतिशत ब्याजमा २३ अर्ब ऋण लिँदै नेवानि

काठमाडौं : नेपाल वायु सेवा निगमले नौ प्रतिशत ब्याजदरमा कर्मचारी सञ्चय कोष र नागरिक लगानी कोषबाट २३ अर्ब रुपैयाँ ऋण लिने भएको छ । दुईवटा वाइडबडी जहाज खरिदका लागि दुईवटा निकायबाट साढे ११ अर्ब रुपैयाँका दरले ऋण लिने सहमति भएको नेवानिका प्रवक्ता रविन्द्र श्रेष्ठले जानकारी दिनुभयो ।

'ऋण लिने र दिने विषयमा कोषसँग सहमति भएको छ', उहाँ भन्नुहुन्छ, 'तर, लिखित सहमति भने भइसकेको छैन ।' ऋण लिने र दिने विषयमा नेवानि र कोषको सञ्चालक बोर्डबाट स्वीकृत हुनपर्छ । अहिले दुवै निकायको बोर्डमा यस विषयमा छलफल भइरहेको छ ।नेवानिले आगामी वर्षको जेठभित्रै दुईवटा वाइडबडी जहाज ल्याउने गरी अमेरिका लिजिङ कम्पनी एएआरसँग खरिद सम्झौता गरिसकेको छ ।

नेवानिले खरिद सम्झौतामा एक महिनाभित्रै पहिलो किस्ताबापत ३५ प्रतिशत रकम दिने सहमति गरेको थियो । तर, ऋण सम्झौतामा ढिलाईका कारण रकम पठाउन सकेको छैन । रकम पठाउन ढिला भए पनि जहाज आउने समय ढिला नहुने निगमका महाप्रबन्धक सुगतरत्न कंसाकारले बताउनुभयो । अन्तर्राष्ट्रिय उडान भर्दै आएको एउटा बोइङ पनि ग्राउन्डेड भएसँगै अहिले नेवानिसँग अन्तर्राष्ट्रिय उडानका लागि दुईवटा न्यारोबडी एयरबस मात्रै बाँकी छ । जहाज आउन जति ढिला हुन्छ नेवानिको विश्वसनियता खस्कँदै जाने अवस्था सिर्जना भएको छ ।

'नेवानिले आगामी साता १५ वर्षका लागि ऋण सम्झौता गर्नेछ', श्रेष्ठ भन्नुहुन्छ, 'त्यसपछि पहिलो किस्ताबापतको ३५ प्रतिशत रकम पठाउने हो ।' यसअघि नै एएआरले नेवानिसँग पौने ११ करोड रुपैयाँ लगिसकेको छ ।

निगमले ३३०-२०० सिरिजका दुईवटा वाइडबडी जहाज २०९.६ मिलियन अमेरिकी डलर अर्थात् २२ अर्ब ६३ करोड रुपैयाँमा खरिद गर्नेछ ।निगमले खरिद गर्ने जहाजमा २५० देखि २८० सम्म सिट रहनेछ । जसमा १२ देखि १६ वटा बिजनेस क्लास सिट हुनेछ । जहाज खरिद सम्झौता अनुसार एएआरले निगमलाई सन् २०१८ को अप्रिलभित्र पहिलो एयरबस र दोस्रो एयरबस मेभित्रै उपलब्ध गराउने उल्लेख छ । निगमले एक हजार घन्टासम्म उडेको जहाज खरिद गर्ने प्रस्ताव आह्वान गरेको भए पनि एएआरले निगमलाई ब्रान्डेड जहाज नै दिनेछ ।

वाइडबडी जहाज नआउँदासम्म व्यवस्थापन गर्न नेवानिले भाडामा जहाज लिन टेन्डर आह्वान गरे पनि कुनै पनि विदेशी कम्पनीले चासो देखाएका छैनन् । दोस्रो पटक थप गरिएको १५ दिन सकिन पाँच दिन बाँकी रहँदा पनि कसैले चासो नदेखाएको कंसाकार बताउनुहुन्छ ।