द्वन्द्वपछि भारतमा इन्टरनेटमा रोक
लखनउ : भारतको उत्तरी राज्य उत्तर प्रदेशको सहारनपुरमा मोबाइल इन्टरनेट र म्यासेज सेवामा प्रशासनले बिहीवार रोक लगाएको छ । जातीय संघर्ष बढेर स्थिति नियन्त्रणमा लिन कठिन भएपछि मोबाइलमा इन्टरनेट र म्यासेज सेवामा प्रतिबन्ध लगाइएको हो ।
जिल्ला प्रशासनका अनुसार कुनै पनि खाले अफवाह रोक्न यस्ता कदम उठाउनुपरेको स्पष्ट पारेको छ । जिल्लाका प्रमुख प्रशासक एनपी सिंहले एक आदेश जारी गर्दै भनेका छन्, ‘टेलीफोन कम्पनीद्वारा उपलब्ध इन्टरनेट, म्यासेजिङ र सामाजिक सञ्जालमा अफवाह र भ्रामक सूचना प्रवाह गर्न खोजिरहेको संकेत पाएका छौं । धारा १४४ प्रयोग गर्दै टेलिफोन कम्पनीका मोबाइल नेटवर्कमा उपलब्ध सबैखालका म्यासेज, इन्टरनेट र सामाजिक सञ्जालका सुविधामा रोक लगाएका छौं ।'
बुधबार मात्रै सहारनपुरका डिस्ट्रिक्ट मेजेस्टेट एनपी सिंह र एसएसपी सुभाषचन्द्र दुबेलाई पदबाट निलम्बन गरिएको थियो । विभागीय प्रमुख र डीआईजीलाई पनि सरुवा गरिएको छ । शान्ति सुरक्षा कायम गर्न नसकेको भनेर उत्तर प्रदेशका मुख्यमन्त्री योगी आदित्यनाथले असन्तुष्टि व्यक्त गरेका हुनाले उनीहरूलाई कारबाही गरिएको बताइएको छ । सहारनपुर जिल्लामा तीन साताको अवधिमा चौथोपटक हिंसात्मक घटना भएका छन् । त्यस क्षेत्रको स्थिति निकै तनावपूर्ण रहेको छ । भिडन्त रोक्न ठाउँठाउँमा सुरक्षाकर्मीलाई तैनाथ गरिएको छ ।
योगीले सहारनपुर घटना दुःखद र दुर्भाग्यपूर्ण भएको बताउँदै दोषीलाई कडा कारबाही सुरु गरिसकेको स्पष्ट पारेका छन् । मंगलवारको हिंसामा मारिएका आशीषका आफन्तलाई सरकारले १५ लाख र प्रत्येक घाइतेलाई ५०÷५० हजार रुपैयाँ सहयोग गर्ने घोषणा गरेको छ । सहारनपुर प्रान्तीय राजधानी लखनउबाट ७११ किलोमिटर उत्तरपश्चिममा रहेको छ । त्यहाँ दलित समुदाय र राजपुत समुदाबीच भिडन्त भएको थियो । साबिरपुरस्थित केही राजपूतहरूको भवनमा दलित समुदायले ढुंगा प्रहार गरेपछि यी दुई समुदायबीचको तनाव सुरु भएको थियो ।
प्रहरीले हालसम्म २४ जनालाई गिरफ्तार गरेका छन् । कैयौं घरमा तोडफोड र आगजनी गरिएका छन् । यसै भिडन्तलाई लिएर राजनीतिक दलबीच आरोप-प्रत्यारोप सुरु भएको छ । बहुजन समाज पार्टीकी प्रमुख मायावतीले भारतीय जनता पार्टी (भाजपा)को सरकारले हिंसा र गुण्डागर्दी गरेको आरोप लगाएकी छन् । उनले दलित व्यक्तिहरूको समर्थनमा राजनीति गर्दै आएकी छन् । भाजपाले अराजक स्थितिका लागि मायावतीले उकासेको आरोप लगाएको छ ।
केही महिनाअघि भएको निर्वाचमा नराम्ररी पराजित भएपछि मायावतीले राजनीति गर्न यस्तो उक्साहट गरेको उसको आरोप छ । उत्तर प्रदेशका मुख्यमन्त्री योगी आदित्यनाथले उक्त घटना दुःखद भएको बताउँदै दोषीलाई कारबाही गरिने स्पष्ट पारेका छन् । उनले सबै राजनीतिक दल र नागरिकलाई शान्ति कायममा सहयोग गर्न आह्वान गरेका छन् ।