शान्तिका लागि सडक नाटक 

चौतारा :  सशस्त्र द्वन्द्वका क्रममा बेपत्ता भएका कुभिन्डेका माधव नेपालकी आमा तुलसीमायाले आँखामा आँसु थाम्न सकिनन् । सडकमा कलाकारले बेपत्ता भएका आफन्तको खोजीका लागि छानबिन आयोगको भर गरेको दृश्य हेर्दै गर्दा उनका आँखा रसाएका हुन् । स्थानीय शान्ति समिति सिन्धुपाल्चोकको आयोजनामा आवाज आर्ट क्रियसनले प्रस्तुत गरेको सडक नाटकका दृश्य हेर्दै गर्दा उनले त्यसमा आफ्नो कथा भेटिन् । कलेज पढ्न राजधानी गएको छोरा वर्षौंदेखि बेपत्ता भएको पीडा उनीसँग अझै ताजा छ । शान्तिप्रक्रिया सुरु भएसँगै छोराको खोजीमा कयौं पटक राजधानी र सदरमुकाम चौतारामा धाएकी तुलसीमाया अब बेपत्ता छानबिन आयोगको प्रतिवेदनको पर्खाइमा छन् ।

बिहीबार चौतारामा प्रदर्शित नाटकले पनि उनकैजस्तो पीडा भएकालाई सत्य निरूपण र बेपत्ता छानबिन आयोगले न्याय दिलाउने आशा व्यक्त गरिएको थियो । नेपालका छोरा माधव बेपत्ता छन् । अर्का छोरा प्रेमको द्वन्द्वका बेला राज्यपक्षबाट हत्या भएको थियो ।

सातादेखि जिल्लाको विभिन्न भागमा प्रदर्शित नाटक सदरमुकाम चौतारामा प्रदर्शन गरी समापन गरिएको स्थानीय शान्ति समितिकी सचिव दुर्गा आचार्यले जानकारी दिइन् । आचार्यका अनुसार मेलमिलाप र आपसी सद्भावले दिगो शान्ति सम्भव हुने भावको सडक नाटक प्रदर्शन गरिएको हो । दिगो शान्तिका लागि सबैको भूमिका महत्ववपूर्ण हुने सन्देश दिने प्रयास गरिएको आवाज आर्ट क्रियसनका निर्देशक कृष्ण धिताल चिरिच्याट्टले बताए ।

नाटकले सामाजिक सद्भाव कायम गर्न सघाउ पुर्‍याउने स्थानीय शान्ति समितिका पूर्वसंयोजक एवं चौतारा साँगाचोकगढी नगरपालिका प्रमुख अमानसिं तामाङले बताए । नाटक जिल्लाको मेलम्ची, तालामाराङ, बाहुनेपाटी, बाह्रबिसे, खाडीचौर, ठूलोपाखर, कोठे, साँगाचोक, चौतारा र नवलपुरमा प्रदर्शन गरिएको स्थानीय शान्ति समितिले जनाएको छ ।