कोलम्बो : श्रीलंकाको विभिन्न ठाउँमा आएको बाढी पहिरोमा परी एक सयजनाको मृत्यु भएको विपत्ति व्यवस्थापन केन्द्रका उपमन्त्री दुनेश गनकानदाले शनिबार जानकारी दिएका छन् ।
प्रकोप व्यवस्थापन मन्त्रालयले अहिलेसम्म पनि ९९ जना हराइरहेको र खोजी तथा उद्धारकार्य जारी रहेको बताएको छ । गत बिहीबार आएको भीषण वर्षापछिको बाढीपहिरोले अहिलेसम्म देशभरका विभिन्न ठाउँका दुई लाखभन्दा बढी मानिसलाई असर पारेको छ । जलवायु विभागले दक्षिण पश्चिमी टापु क्षेत्रमा शनिबार पनि वर्षा र हावाहुरी आएको छ । बाढीपहिरोले सयौं भवन ध्वस्त भएका छन् । सडक सञ्जालको सम्पर्क टुटेको छ । पीडितसम्म अझै पनि पुग्न नसकेको प्रशासनले स्पष्ट पारेको छ ।
सरकारले होचो भूभागमा अझै पानी जम्मा हुने चेतावनी दिएको छ । सरकारले पानीको स्तर बढ्न सक्ने चेतावनी दिँदै उचाइ भएका ठाउँमा जान आग्रह गरेको छ । श्रीलंकाको विदेश मन्त्रालयले पनि घटनास्थलमा आपत्कालीन उद्धार एकाइका तर्फबाट उद्धार तथा राहत व्यवस्थापनका लागि काम गरिरहेको छ ।
मन्त्रालयले पीडितलाई उद्धार तथा राहतका लागि सहयोग गर्न संयुक्त राष्ट्रसंघ र छिमेकी मुलुकलाई पनि आग्रह गरेको छ । श्रीलंकामा उद्धारका लागि भारतीय सहयोगी टोली कोलम्बो आइपुगेका छन् । चिकित्सक र आकस्मिक उद्धार टोली शनिबार बाढीप्रभावित ठाउँमा पुगिसकेको छ । औषधि भरिएको एक जहाज पनि श्रीलंका आइपुगेको बताइएको छ । ९० जना घाइतेको अस्पतालमा उपचार भइरहेको छ ।
श्रीलंकाको वायु सेना र नौसेना बाढीमा फसेका व्यक्तिको उद्धारका लागि हेलिकोप्टर र डुंगाबाट पुग्ने प्रयास गरिरहेका छन् । कुनै क्षेत्रमा ६०० मिलिमिटरभन्दा बढी वर्षा मापन गरिएको छ । १४ वर्षयताकै सबैभन्दा अत्यधिक वर्षा भएको सम्बन्धित संस्थाले बताएको छ । मौसम विभागका प्रमुख आरएस जयशेखरले अझै वर्षाको सम्भावना रहेको बताएका छन् । आगामी मंगलवारदेखि पुनः भीषण वर्षा हुने उनले बताए ।
कलुतारा जिल्लामा भूस्खलन र रत्नापुरा जिल्लामा बाढीले सबैभन्दा बढी श्रीलंकाली मारिएका छन् । पश्चिमी र दक्षिणी प्रान्तका सबारागामुवामा १ हजार ८ सय ११ घरपरिवार प्रभावित भएका छन् । कृषिका लागि श्रीलंकामा व्यापक रूपमा वन फँडानी गरिएपछि केही वर्षदेखि बाढी र भूस्खलनको चपेटामा पर्दै आएको छ । गत वर्ष पनि भूस्खलनबाट एक सय व्यक्तिको मृत्यु भएको थियो ।
प्रतिक्रिया दिनुहोस !
