आइएसको आक्रमणमा १९ फिलिपिनो मारिए

मरावी (फिलिपिन्स) : फिलिपपिन्सको दक्षिणी सहरमा इस्लामिक स्टेट (आइएस)का लडाकुले सडक अवरुद्ध गरी सुरक्षाकर्मीसँग सुरु गरेको सशस्त्र भिडन्तका कारण १९ सर्वसाधारणको मृत्यु भएको सैनिक स्रोतले जानकारी दिएको छ । त्यस सहरमा करिब एक सातादेखि आइएसका लडाकु र सुरक्षाबलबीच जारी भिडन्तमा ८५ जनाको ज्यान गइसकेको छ । गत मंगलबार राष्ट्रपति रोड्रिगो डुतेर्तेले मिन्दानाओ क्षेत्र र मरावी नगरमा संकटकाल घोषणा गर्दै त्यहाँ तुरुन्तै सैनिक कानुन लागू गरेका थिए । यद्यपि आइएस विद्रोहीले द्वन्द्व जारी राखेका छन् ।

अधिकारीका अनुसार प्रायः मुसलमान बहुल करिब २ लाख जनसंख्या रहेको मरावी सहरमा आइएसले १९ सर्वसाधारणको हत्या गरेका छन् । हत्या भएका ती व्यक्तिमा तीन महिला र एक बालकको रहेका र उनीहरूको शव एक विश्वविद्यालय नजिकै रहेको बताइएको छ । मरावी सहरको बाहिरी इलाकामा रहेको एक सडकमा आइतबार आठवटा शव छरिएर रहेका थिए । ती शव चामल कारखाना र मेडिकल कलेजमा कार्यरत व्यक्ति भएको स्थानीय बासिन्दाले जानकारी दिएका छन् । गत सातादेखि जारी यस भिन्डतमा १३ सैनिक, २ प्रहरी, ५१ जना आतंककारी र १९ जना सर्वसाधारणको मृत्यु भएको छ । दक्षिणी फिलिपिन्सको लानाओ डेला सुर प्रान्तमा पर्ने मिन्दानाओ क्षेत्र र मरावी नगरमा अतिवादी इस्लामी सशस्त्र समूहले गत सातादेखि सरकारविरुद्ध भीषण युद्ध सुरु गरेका थिए ।

राष्ट्रपति डुतेर्ते, केही मन्त्रीगण तथा उच्च पदस्थ अधिकारी रूस भ्रमणमा भएको मौका पारी अतिवादी इस्लामी सशस्त्र समूहले आक्रमण गरी मरावी नगरमा कब्जा जमाएको थियो । उनीहरूले त्यहाँको नगर सभागृह, एक अस्पताल र स्थानीय कारागार कब्जामा लिएका थिए । आतंककारी आक्रमण र सुरक्षाकर्मी एवम् व्यापक क्षति भएको खबर पाउनासाथ राष्ट्रपति भ्रमण छोट्याएर स्वदेश फर्किएका थिए । उनले स्वदेश फर्किरहेको विमानबाटै संकटकाल घोषणा गर्दै सैनिक कानुन लागू गरेका थिए । राष्ट्रपति डुतेर्तेले हाल ६० दिनसम्म दक्षिणी मिन्दानाओको सबै क्षेत्रभरि सैनिक कानुन लागू गरिएको र आवश्यक परे एक वर्षसम्म पनि सैनिक कानुन लागू गर्न सकिने स्पष्ट पारेका छन् । रासस\एएफपी