आइएसको कब्जाबाट पाल्मिरा सहर मुक्त

दमासकस : इस्लामिक स्टेट्स (आईएस) लडाकुहरूले कब्जामा राखेको सिरियाको झण्डै १४ सय वर्ग किलोमिटर क्षेत्र सिरियाली सेना र अन्य सुरक्षाकर्मीको संयुक्त प्रयासमा मुक्त भएको छ । गत चौबीस घण्टाको अवधिमा सरकारी सुरक्षा फौजले पाल्मीरा सहर क्षेत्रमा आईएस लडाकुविरुद्धको सफलता प्राप्त भएको साना समाचार संस्थाले जनाएको छ । सिरियाली सेनाले हालै मात्रै आईएस लडाकुविरुद्ध सिरियाका विभिन्न ठाउँमा आक्रामक कारबाही गर्ने घोषणा गरेको थियो ।

सुरक्षा कारबाही सिरियाको उत्तरी प्रदेश अलेप्पोको दक्षिणपूर्वी केही ग्रामीण क्षेत्रमा समेत भइरहेको र त्यहाँ विगत केही दिनमा सिरियाली सेनाद्वारा हजारौं आइएस लडाकु मारिएका छन् । सिरियामा सन् २०११ को मार्च महिनाबाट त्यहाँका राष्ट्रपति बसर अल असादको राजीनामा माग गर्दै सुरु भएको आन्दोलन केही समय पछाडि गृह युद्धमा परिणत भएको थियो । यस गृहयुद्धमा अलकायदा र इस्लामिक स्टेट्सजस्ता आतंककारी समूहको बिगबिगी बढ्दै गयो । सन् २०११ देखि हालसम्म जारी द्वन्द्वमा परी सिरियामा तीन लाख २० हजारभन्दा बढी व्यक्तिको मृत्यु हुनको साथै अन्य लाखौं व्यक्ति घाइते भएका छन् । लाखैाँ सर्वसाधारण आफ्नो घरवास छोडी स्वदेशमा र छिमेकी देशमा शरणार्थी बन्न बाध्य भएका छन् ।

आईएस गढमा सेना

मोसुल : इराक सरकारलाई समर्थन गर्दै आएको सेनाले आइतवार इस्लामिक स्टेट (आईएस)को महत्वूपर्ण किल्ला मोसुल सहरको पश्चिमी भाग पुनः नियन्त्रणमा लिएको छ । इराककी सेनका 'पपुलर मोबलाइजेशन फोर्सेज'का नेता अबु माहदी अल मुहान्दिसले आफ्ना सैनिकले मोसुलबाट १३० किलोमिटर दूरीमा रहेको अल बाजमा आक्रमण गरेर आफ्नो नियन्त्रणमा लिएको जानकारी दिए ।

सिरियासँग सीमा जोडिएको यस क्षेत्रमा आईएसलाई त्यहाँबाट हटाउन भीषण युद्ध भइरहेको छ । सेना र इराकी जनताले अल बाज आईएसको कब्जाबाट मुक्त भएकोमा आइतवार खुसीयाली मनाएका छन् । अल मुहान्दिसले मुस्लिमहरूको पवित्र महिना रमदानमा पनि आफ्ना सैनिकले आईएसविरुद्ध लडाइँ जारी राखेको भन्दै सह्राना गरेका छन् । उत्साहित हुँदै उनले अरू क्षेत्रमा पनि आफूहरूले जित हासिल गर्ने विश्वास व्यक्त गरे।