'आक्रमणको दोष पाकिस्तानमाथि नलगाऊ'
इस्लामाबाद : संयुक्त राज्य अमेरिकाका लागि पाकिस्तानकी राजदूत मलिहा लोधीले अफगानिस्तानमा भएका आतंकवादी आक्रमणको दोष पाकिस्तानमाथि लगाउन बन्द गर्नुपर्ने बताएकी छन् । अफगानिस्तानले आतंकवादी आक्रमणमा अनावश्यक रूपमा पाकिस्तानलाई दोष दिने गरेको बताइन् ।
लोधीले यस्ता आरोपका पछि कुद्नुभन्दा अफगानिस्तानले आफ्नो सुरक्षा व्यवस्था बलियो बनाउन सुझाव दिएकी छन् । भ्वाइस अफ अमेरिकालाई अन्तर्वार्ता दिँदै उनले आतंकवादसँग पाकिस्तान लड्न तयार भएको पनि बताइन् । आतंकवादी तत्वसँग लड्न अफगानिस्तानलाई मद्दत गर्न पाकिस्तान उत्सुक भएको उनको भनाइ थियो । यसका लागि अफगानिस्तानले केही कदम चाल्नुपर्नेमा जोड दिइन् । अफगानिस्तानले आफ्नो आन्तरिक विषय संसारभर छरपस्ट पारेर आफूले आफैंलाई कमजोर बनाउने गरेको उनको दाबी थियो ।
लोधीले भनिन्, ‘अफगानिस्तानमा भएका हिंसक घटनाबाट स्पष्ट हुन्छ, आतंकवादी संगठन इस्लामिक स्टेट (आईएस)ले त्यहाँ आफूलाई सशक्त रूपमा विस्तार गर्दै छ ।' आईएसको यस्तो विस्तार कसैका लागि पनि हितमा नहुने उनले स्पष्ट पारिन् । यस घटनाबाट दक्षिण एसियाका सबै मुलुक प्रभावित हुने उनले स्पष्ट पारिन् । उनले भनिन्, ‘हालैको आक्रमण अफगानिस्तान र उसको छिमेकी मुलुक पाकिस्तानलाई पनि खतरनाक छ ।' पाकिस्तान र अफगानिस्तानबीचको सम्बन्ध बिगार्न चाहने तत्वहरूले काबुल आक्रमण गरेको उनले दाबी गरिन् । आतंकवाद र हिंसक तत्वलाई पराजित गर्न सबै मिलेर एकजुट हुनुपर्नेमा उनले जोड दिइन् ।
अफगानिस्तानी गुप्तचर अधिकारीहरूले काबुल आक्रमणमा पाकिस्तानलाई आधार बनाएर आतंक मचाउँदै आएको हक्कानी सञ्जालको हात रहेको बताउँदै आएका छन् । उनीहरूले पाकिस्तानी गुप्तचर संस्था आईएसआईले तालिबान समर्थित हक्कानी सञ्जाललाई सहयोग गर्ने गरेको दाबी गर्दै आएका छन् । काबुल आक्रमणमा ९० जनाको मृत्यु भएको थियो । आक्रमणबाट ३ सय ५० जना घाइते भएका थिए । लोधीले दुई देशबीचको सम्बन्ध बिगार्न चाहनेहरूको काम भएकाले अफगानिस्तानले त्यो बुझ्नुपर्ने धारणा सार्वजनिक गरिन् ।
यसै आक्रमणको विरोधमा अमेरिकामा बसोवास गर्दै आएका अफगानमूलका व्यक्तिहरूले शुक्रबार अमेरिकास्थित पाकिस्तानी दूतावास बाहिर विरोध प्रदर्शन गरेका थिए । उनीहरूले अफगानिस्तानमा आतंक मचाउँदै आएका संगठनलाई पाकिस्तानले सहयोग गरेको बताएका थिए । उनीहरूले पाकिस्तानविरोधी ब्यानर र पोस्टर प्रदर्शन गरेका थिए । ‘आतंकवादीलाई आर्थिक सहयोग रोक' लगायत पाकविरोधी थुप्रै नारा लगाएका थिए ।
सन् २००१ पछि अफगानिस्तानमा भएको यो सबैभन्दा ठूलो आक्रमण हो । उक्त आक्रमणमा करिब १५०० किलोग्राम विस्फोटक पदार्थ प्रयोग गरिएको अधिकारीहरूकको भनाइ छ । यो आक्रमण कूटनीतिक संस्था भएका क्षेत्रमा गरिएको थियो । आक्रमणमा ५० वटा गाडी ध्वस्त भएका थिए ।
हजारौं संदिग्ध आतंकवादीका बैंक खाता रोक्का
पाकिस्तानले संदिग्ध आतंकवादी भएको बताउँदै करिब ५ हजारभन्दा बढी व्यक्तिका बैंक खाता रोक्का गरेको छ । सन् २०१४ मा पेसाबरस्थित स्कुलमा भीषण आक्रमण भएपछि पाकिस्तानले यस्तो कदम चालेको हो । उनीहरूको तीन करोड रुपैयाँ सरकारले रोक्का गरेको बताइएको छ । पाकिस्तानी गृहमन्त्रालयका एक अधिकारीले भने, ‘पाकिस्तानले आतंकवादीका बैंक खाते रोक्का गराएको छ । उनीहरूको परिचयपत्र निलम्बन गरेर उनीहरूमाथि कारबाही गरिएको छ ।' उनले पेसाबर आक्रमणपछि सुरक्षाका लागि २० सूत्रीय यानेजना बनाइएको र यसै अनुरूप यस्तो कारबाही गरिएको उनले स्पष्ट पारे ।