बूढीगण्डकी प्रभावितलाई मुआब्जा वितरण
गोरखा : १२ सय मेगावाटको बुढीगण्डकी जलाशययुक्त आयोजनाबाट डुबानमा पर्नेहरुलाई अहिलेसम्म एक अर्ब १९ करोड ३६ लाख रुपियाँ मुआब्जा बितरण भएको छ । जिल्ला प्रशासन कार्यालयबाट प्राप्त तथ्याङ्क अनुसार घ्याल्चोक, भुम्लिचोक र दर्बुङका डुबान प्रभावितलाई सो मुआब्जा वितरण गरिएको हो ।
‘अहिलेसम्म पाँचसय ८३ जनालाई मुआब्जा वितरण गरिसकिएको छ' प्रमुख जिल्ला अधिकारी जितेन्द्र बस्नेतले भन्नुभयो ‘उनीहरुलाई कुल एक अर्ब १९ करोड ३६ लाख ८० हजार दुईसय ३७ रुपियाँ मुआब्जा वितरण भएको छ ।' डुबान प्रभावितलाई गत फागुनको ११ गतेबाट मुआब्जा वितरण सुरु गरिएको हो । पहिलो चरणमा जम्मा ३२ जनालाई मुआब्जा वितरण गरिएको थियो ।
‘दोस्रो चरणमा एकसय दुई जनालाई, तेस्रो चरणमा ६५ जनालाई, चौथो चरणमा एकसय ४८ र पाँचौं चरणमा दुईसय ३६ जनालाई मुआब्जा बाँडिएको हो' प्रजिअ बस्नेतले भन्नुभयो ‘यो क्रम निरन्तर चलिरहनेछ ।' चालु आर्थिकबर्ष भित्र मुआब्जा वितरण गर्नका लागि गोरखामा साँढे दुई अर्ब र धादिङका लागि साँढे दुई अर्ब रुपियाँ प्राप्त भएको थियो ।
आयोजना निर्माणको लागि पेट्रोलमा प्रतिलिटर पाँच रुपैयाँ कर उठाउने कामलाई निरन्तरता दिएको छ । आयोजना निर्माणको लागि चालु आर्थिक वर्षबाट सुरु गरिएको पेट्रोलमा लगाइएको करबाट नौ अर्ब ५० करोड रुपैयाँ उठिकसेको छ । आयोजना निर्माण हुँदा गोरखा र धादिङका करिब ३५ सय घर धुरी पूर्ण रुपमा विस्थापित र ४५ सय घरधुरी आंशिक रुपमा प्रभावित हुने आयोजनाको विस्तृत अध्ययन प्रतिवेदनमा उल्लेख छ । सरकारले आर्थिक वर्ष २०६९÷७० देखि यो आयोजना निर्माणमा बजेट बिनियोजन गर्दै आएको हो ।
आगामी आर्थिक वर्ष ०७४ र ०७५ का लागि सरकारले १० अर्ब बिनियोजना गरेको छ । आर्थिक वर्ष ०६९÷७० को बजेटमा सरकारले ५५ लाख २५ हजार रुपैयाँ बिनियोजन गरेकोमा त्यसमध्ये ६२.५१ प्रतिशत मात्रै खर्च भएको थियो । आर्थिक वर्ष ०७०÷०७१ मा ५७ करोड ९ लाख रुपैयाँ बिनियोजन गरिएको थियो । तर पूर्ण रकम खर्च नभई २० प्रतिशत रकम फ्रिज भएको थियो । त्यस्तै आर्थिक वर्ष ०७१÷०७२ मा ५७ करोड २० लाख, आर्थिक वर्ष ०७२÷०७३ मा ३ अर्ब ३३ करोड रुपैयाँ बिनियोजन गरेको थियो । यी दुई आर्थिक वर्षमा गरी जम्मा २० प्रतिशत रकम खर्च भई ८० प्रतिशत रकम फ्रिज हुन पुग्यो ।
चालु आर्थिक वर्षमा पाँच अर्ब ३३ करोड बिनियोजन गरिएको थियो । आगामी आर्थिक वर्षको लागि बुढीगण्डकी जलविद्युत् आयोजनाको लागि १० अर्ब १७ करोड रुपैयाँ रकम बिनियोजन गरेको छ ।
प्रतिक्रिया दिनुहोस !
