मिस्टर नेपाल : एकाएक जसको दैनिकी बदलियो

एकाएक अक्षयजंग रायमाझीको दैनिकी फेरिएको छ । शनिबार बिहानसम्म उनी सामान्य दैनिकीमा हुन्थे । बिहानै नित्यकर्म गर्नु, क्लब जानु अनि कलेज पढेर घर फर्कनु उनको दैनिकी थियो । २२ वर्षअघि काठमाडौंको बानेश्वरमा बुवा गम्भीरजंग रायमाझी र आमा सरिता थापा रायमाझीको कोखबाट जन्मिएका अक्षयजंगको दैनिकी शनिबारयता एकाएक बदलियो । लिबर्टी कलेजमा बीबीए अध्ययनरत उनको चर्चा चुलियो र व्यस्तता बढ्यो । उनी शनिबार ‘मिस्टर नेपाल' घोषणा भए । अक्षयले कसरी यो यात्रा थाले ? अन्नपूर्णकर्मी काजी श्रेष्ठले गरेको कुराकानीः

मिस्टर नेपालको उपाधि जित्ने कहिल्यै सोच्नुभएको थियो ?
मोडलिङ गर्ने सानैदेखिको रहर हो । सानै छँदा पत्रपत्रिका, म्यागेजिनमा फोटोहरू देख्दा म पनि यस्तो बन्न पाए हुन्थ्यो जस्तो लाग्थ्यो । म्युजिक भिडियो, विज्ञापनहरूमा अरू आउँदा म पनि कुनै दिन यस्तै हुन पाए हुने नि भन्ने फिल हुन्थ्यो । मोडल बन्न कुनै न कुनै उपाधि जित्न पाए हुने भन्ने रहर थियो ।

म्युजिक भिडियोमा पनि काम गर्नुभएको थियो ?
करिब डेढ महिनाअघि एउटा म्युजिक भिडियोमा मोडलिङ गरेको थिएँ । ‘एन्टिबायोटिक देऊ' बोलको गीतमा ।

हिजो र आजको आफूमा के फरक अनुभूति गर्नुभयो ?
हिजोका दिनमा म एउटा साधारण नागरिक थिएँ । हिजो भाइ, साथी भनेर चिन्दथे तर अहिले नामको अघि ताज राख्दा फिलिङ्स अर्कै हुँदो रहेछ । एउटा साधारण नागरिक हुँदा परिवार र आफूलाई मात्र गनिने हुन्थ्यो । मिस्टर नेपाल हुँदा जिम्मेवारी बढेको महसुस गरेको छु । आफन्तमात्र होइन अञ्जानहरूको पनि साथ पाएको छु ।

प्रतिक्रिया कस्तो पाउनु भएको छ ?
सहभागी हुँदा नै केही न केही हुन्छस् भनेर परिवार, छिमेकी, साथीहरूबाट हौसला पाएको थिएँ । मिस्टर नेपाल उपाधि जितेपछि जिम्मेवारी बढेको छ, राम्रोसँग अघि बढ्न सुझाव आएको छ । सम्पूर्णको सहयोग, सद्भाव पाएको छु । मिस्टर नेपाल बनिसकेपछि प्रतिस्पर्धी सबैले माया र सहयोग गर्नुभएको छ ।

अब अघि बढ्न परिवारको सपोर्ट कस्तो छ ?
मेरो बाबाले दिनरात केही नभनी मलाई सपोर्ट गर्नुभयो । मिस्टर नेपाल बनिसकेपछि थप सपोर्ट पाएको छु । मिस्टर वल्र्डको लागि हरेक खालका सपोर्ट गर्ने वचन दिनुभएको छ । मभन्दा उहाँ चिन्तित हुनुहुन्छ भन्ने अनुभूति गरेको छु । किनकि यो मेरो, परिवारको मात्रै नभएर देशकै लागि अर्थ राख्ने उपाधि पनि हो।

मिस्टर नेपाल बनेपछिको योजना के छ ?
मेरो मुख्य फोकस भनेको मिस्टर वल्र्डमा रहेको छ । मिस्टर नेपालको ताज बोकेर मिस्टर वल्र्डमा जाँदैछु । इङ्ल्यान्डमा हुने मिस्टर वल्र्डमा नेपाललाई चिनाउने मेरो मुख्य उद्देश्य हो । पछि गएर समाज र राष्ट्रको लागि नमुना काम गर्नेछु । समाजमा साना तर राम्रा काम गरेर अघि बढ्न चाहन्छु ।

युवालाई के सन्देश दिन चाहनुहुन्छ?
म पनि साधारण अवस्थाबाटै मिस्टर नेपालसम्म आइपुगेको हुँ । हरेक व्यक्तिले सपना देख्नुपर्छ । सम्पूर्ण युवालाई जिन्दगीका सपना देख्न आग्रह गर्दछु । सपना साकार गर्न लगनशील हुनुहोस्, मेहनत गर्नुहोस् सफलतता अवश्य मिल्नेछ । सपना पूरा गर्न भगवान्ले पनि साथ दिन्छन् । म उदाहरणको पात्र पनि हो।

प्रेम प्रस्ताव आएको छ ?
अहिलेसम्म आएको छैन । प्रेममा खासै रुचि छैन । लभ र विवाह एकपटक मात्र हुनुपर्छ । यही सोंचका साथ अघि बढेको छु । उपयुक्त मान्छे भेटिएको छैन । सामाजिक सञ्जालमा धेरैले साथीको रूपमा पछ्याएका भने छन् ।