हेटौंडा : हेटौंडेली दर्शकहरुले देशभरको कला र संस्कृति एकै ठाउँमा हेर्न अवसर पाएका छन् । कला र संस्कृतिको संरक्षण गर्ने उदेश्यले हेटौंडामा जारि तीन दिने राष्ट्रिय संङ्गीत तथा नृत्य महोत्सव बुधबार सकिएको हो ।
नेपाल सङ्गीत तथा नाट्य प्रज्ञा प्रतिष्ठानको आयोजनामा भएको महोत्सवमा देशका बिभिन्न क्षेत्रका नृत्य र गित प्रस्तुत गरिएको थियो ।महोत्सवको अन्तिम दिन बुधबार तामाङ्ग, मगर, गुरुङ्ग र नेवारको आकर्षक साँस्कृतिक नृत्य प्रस्तुत गर्दा हेटौंडेली दर्शकले हेटौंडा २ स्थित पल्पसा हलमा गर्मीको प्रवाह नगरि रमाईरहेका थिए । कार्यक्रममा मकवानपुरबाट राष्ट्रिय ख्याती कमाएका कलाकारहरु कमल क्षेत्री तथा मिना निरौला, अशोक राई, स्थानीय कलाकारहरु कृष्णगोपाल सिँह, अस्मिता ढकाल, तुलुक बहादुर लामा लगाएतले कला प्रस्तुत गरेका दिए ।
महोत्सवमा महोत्सवको दो श्रो दिन मंगलबार शास्त्रीय संङ्गीत सम्बन्धी अन्तरक्रिया सहित बिशेष शास्त्रीय संङ्गीत प्रस्तुती गरिएको थियो । महोत्सवमा पहिलो दिन सौराहाको मयुरी नृत्य, भोजपुरी, मैथली र थारु गित तथा नृत्य, धिमा नृत्य, सुदुरपश्चिमको छलिया नृत्य, मध्यपश्चिमको चरिया नृत्य, पुर्वाञ्चलको गर्रा, जनकपुरको झिझिया लगाएत प्रस्तुती थियो । महोत्सवमा मेचीदेखि महाकालीसम्मका एक सय १५ जना कलाकारले प्रस्तुती गरेका कार्यक्रमका स्थानीय संयोजक आशाकाजी श्रेष्ठले बताउनुभयो । प्रतिष्ठानले प्रत्येक वर्ष नाट्य महोत्सव गर्दै आएको छ ।
महोत्सव साँङ्गीतिक कार्यक्रमसहित बुधबार मकवानपुरका पाँच जना कलाकर्मीलाई सम्मान पनि गरिएको थियो । संगितकारहरु भोला जोशी, प्रमेन्द्र महर्जन, सानुकाजी महर्जन, गायक कृष्ण गोपाल सिँह र पूर्व गायिका सुशिला पाण्डे मानन्धरलाई सम्मान गरिएको हो । प्रतिष्ठानका उपकुलपती शम्भुजित बाँस्कोटाले उनीहरुलाई खादा लगाएर सम्मान पत्र प्रदान गर्नुभयो ।
कार्यक्रमका प्रमुख आतिथी बरिष्ठ साहित्यकार तुल्सी थापाले राष्ट्रको लागि कला सङ्गीतको माध्यमबाट योगदान दिएकाहरुलाई बुढ्यौलीमा राज्यले नहेरेको गुनासो गर्नुभयो । प्रतिष्ठानका उपकुलपती बाँस्कोटाले देशलाई एकता राख्न कलाकारले भुमिका खेल्नुपर्नेमा जोड दिनुभयो । महोत्सव सम्पन्न गर्न करिब १९ लाख रुपैयाँ खर्च भएको आयोजकले जनाएको छ ।
फोटो क्याप्सन ः बुधबार महोत्सवमा गुरुङ जातिको कौरा नृत्य प्रस्तुत गर्दै कलाकारहरु । फोटो÷कृष्ण सारु मगर ।
प्रतिक्रिया दिनुहोस !
