प्रहरीकै हतियार खोसी आक्रमण
म्युनिख : जर्मनीको म्युनिख शहरस्थित एक रेलवे स्टेशनमा मंगलबार भएको गोली प्रहारमा कैयौं व्यक्ति घाइते भएका छन् । आक्रमणमा संलग्न भएको आरोपमा प्रहरीले एकजनालाई हिरासतमा लिएको छ ।
प्रहरीले ट्विट गर्दै भनेको छ, ‘बवारियन शहरको उन्तेरफोएहरिङ उपनगरमा रेलवे स्टेशन बाहिर भएको गोली प्रहारमा कैयौं घाइते भएका छन् । एक महिला प्रहरी अधिकारी गम्भीर घाइते भएकी छन् ।' प्रहरीले घटनास्थललाई सुरक्षित राख्न सफल भको जानकारी दिइएको छ । प्रहरीका प्रवक्ता माक्र्स डा ग्लोरिया मार्टिन्सले आक्रमणका पछाडि राजनीतिक वा धार्मिक कारण नभएको दाबी गरेका छन् ।
उनले भने, ‘एकजना पुरुष षड्यन्त्रमा संलग्न भएको भेटिएको छ । ऊ व्यक्तिगत कारणले आक्रमणमा उत्रिएको हो ।' आक्रमणकारीले प्रहरी अधिकारीमाथि चल्दै गरेको रेलबाट आगो फ्याँकेको मार्टिन्सले बताए । त्यसपछि प्रहरी अधिकारी र ती व्यक्तिबीच भिडन्त सुरु भएको थियो । यसै क्रममा ती आक्रमणकारीले महिला प्रहरी अधिकारीको हतियार खोसे र गोली प्रहार गर्न सुरु गरेका थिए ।
उनले प्रहार गरेको गोली प्रहरी अधिकारीको टाउकोमा लागेको थियो । उक्त आक्रमणमा अन्य दुईजना गम्भीर घाइते भएका छन् । स्थानीय अस्पतालमा उनीहरूको स्वास्थ्योपचार भइरहेको छ । आक्रमणकारी पनि घाइते भएको प्रहरीले जानकारी दिएको छ । सुरक्षाकर्मीले घटनास्थल वरपरका क्षेत्रमा घेराबन्दी गरेका छन् ।
गत वर्ष जुलाईमा डेभिड अली सोनबोली नामक १८ वर्षीय एक आक्रमणकारीले म्युनिखस्थित एक सपिङ मलमा आक्रमण गर्दा ९ जनाको ज्यान गएको थियो । मार्चमा पनि एक आक्रमणकारीले पश्चिमी शहर ड्यूसेल्डोर्फमा रेलवे स्टेशनमा बन्चरोले आक्रमण गर्दा ९ जना गम्भीर घाइते भएका थिए । गत डिसेम्बरमा आक्रमणकारीले बर्लिनमा एक क्रिसमस बजारमा मानिसहरूमाथि ट्रक चलाउँदा १२ जना मारिएका थिए ।
प्रतिक्रिया दिनुहोस !
