लन्डनमा भीषण आगलागीमा १२ को मृत्यु, सयौं फसेको आशंका
लन्डन : पश्चिम लन्डनको आवासीय ‘ग्रिनफिल टावर ब्लक’ मा बुधबार बिहान सुरु भएको भीषण आगलागीबाट कम्तीमा १२ जनाको मृत्यु भएको छ । दर्जनौं घाइते भएका छन् । उद्धारकर्ताले बुधबार अबेरसम्म ६५ जनालाई उद्धार गरेका छन् । घाइते धेरैलाई अस्पताल लगिएको हुनाले मृतकको संख्या बढ्ने अनुमान गरिएको छ । बुधबार अबेरसम्म उद्धारकार्य जारी छ । भवनभित्र करिब २ सयजना बस्ने अनुमान गरिएको छ । अन्तर्राष्ट्रिय सञ्चारमाध्यमले भने त्यहाँ ६ सयभन्दा बढी व्यक्ति बस्दै आएको बताएका छन् । एक सय २० फ्ल्याट रहेको भवनमा ६ सय व्यक्ति हुनु सामान्य रहेको उनीहरूको भनाइ छ । सबै सुतिरहेका बेला बिहानपख आगलागी भएकाले कोही बाहिर निस्कन नसकेका हुन् ।
कैयौंले आफ्ना परिवार टावरभित्र थुनिएको बताएका छन् । त्यहाँ बस्दै आएकी हनान वहाबीले आफ्ना दाजु र आफन्त त्यहीं रहेको बताइन् । २९ वर्षीया वहाबी नवौं तलामा बस्दै आएकी थिइन् । आगो लागेको थाहा पाएपछि श्रीमान् र छोरीका साथ आफू बाहिर निस्कन सफल भएको उनको भनाइ छ । उनका दाजु भने २१ औं तलामा बस्थे ।
एक जना प्रत्यक्षदर्शीका अनुसार दशौं तलाबाट एक दम्पतीले आफ्ना छोराछोरी तल फ्याँक्दै उनीहरूलाई बचाइदिन आग्रह गरेका थिए । यसैगरी, पाँचौं तलाबाट पाँच वर्षीय बालकलाई तल फ्याँकेका थिए । उनीहरूले तन्नामा छोराछोरी बेरेर तल फ्याँकेको प्रत्यक्षदर्शीले बताएका छन् । त्यहाँ भाग्न खोज्दा कैयौं मान्छे अत्तालिएर मरेको अनुमान गरिएको छ । कैयौंले भने आफू भागेर बचे पनि सबै परिवार थुनिएकाले बाँच्नुको कुनै अर्थ नरहेको बताएका छन् । प्रहरीका अनुसार सयौं संख्यामा बसोबास गरिरहेका कैयौं व्यक्ति थुनिएको आशंका गर्दै सयभन्दा बढी अग्निनियन्त्रक परिचालन गरिएको छ ।
आगलागीको कारण अझै प्रस्ट नभएको र अनुसन्धान भइरहेको प्रहरीले जनाएको छ । भवन बनाउने काममा संलग्न इन्जिनियरहरूलाई पनि उद्धार कार्यमा खटाइएको छ । बेलायतमा पछिल्लो समयमा आतंककारी हमला भएको हुनाले यो आगलागीमा पनि आतंककारीको योजना रहे÷नरहेकोबारे अनुसन्धान भइरहेको बताइएको छ । प्रहरीले भने आगलागीमा त्यस्तो कुनै पनि आतंककारी हमलाको प्रयास नभई त्यहाँ प्राविधिक कारणले नै आगो लागेको जनाएको छ ।
भवनको करिब २१ औं तलातिरबाट आगो निस्किएको देखिएको प्रहरीले जनाएको छ । लन्डनका मेयर सादिक खानले थुनिएका कैयौं व्यक्तिबारे सूचना आइनसकेको बताएका छन् ।
प्रतिक्रिया दिनुहोस !
