भदौ २ मा भुइँमान्छे
काठमाडौं : भलिबल खेलाडी सिपोरा गुरुङ अभिनीत चलचित्र 'भुइँमान्छे'को प्रदर्शन दुई साता पछि धकेलिएको छ । साउन २० गते रिलिज हुने भनिएको यो चलचित्र भदौ २ गतेका लागि सारिएको निर्माण पक्षले जनाएको छ । साउन २० गते शाहरुख खान अभिनीत हिन्दी चलचित्र 'जब ह्यारी मिट सेजल' पनि प्रदर्शन हुने भएपछि 'भुइँमान्छे'को प्रदर्शन मिति सार्नु परेको निर्देशक नवराज बुढाथोकीको भनाइ छ ।
त्यसलगत्तै अक्षय कुमार अभिनीत चलचित्र 'ट्वाइलेट एक प्रेमकथा' प्रदर्शनमा आउने भएकाले चलचित्र 'भुइँमान्छे' दुई साता पछाडि सारिएको हो । बलिउड स्टार अभिनीत चलचित्र प्रदर्शनमा आएपछि नेपाली चलचित्रले हल पाउन गाह्रो हुने भएकाले मिति सार्न बाध्य भएको निर्माण पक्षको भनाइ छ । रोहिणी भट्टराईको लगानीमा बनेको यो चलचित्र पोस्टमार्टम गर्ने व्यक्तिको कथामा केन्द्रित छ ।
यस चलचित्रमा सिपोराका साथै रमेश बुढाथोकी, सहिन प्रजापति, बादल भट्टलगायत शैली थिएटरका कलाकारको अभिनय छ । लामो समयदेखि नाटक निर्देशन गर्दै आएका बुढाथोकीले यसअघि चलचित्र 'वनफूल' निर्देशन गरेका थिए । चलचित्र 'भुइँमान्छे' उनको दोस्रो चलचित्र हो । भदौ २ गते हेमराज बीसी निर्देशित चलचित्र 'ग्याङस्टार ब्लुज' पनि रिलिज हुँदैछ ।
प्रतिक्रिया दिनुहोस !
