दीपिका भइन् मिस नेपालगन्ज

नेपालगन्ज : नेपालगन्जकी दीपिका श्रेष्ठ मिस नेपालगन्ज २०१७ भएकी छिन् । नौजना प्रतियोगीहरुलाई उछिन्दै उनी मिस नेपालगन्ज भएकी हुन् । शनिबार राति भएको फाइनल राउण्डबाट उनी मिस नेपालगन्जको ताज पहिरिन सफल भइन् ।

नेपालगन्ज न्यूरोड निवासी दीपिकाले मिस ट्यालेन्टको उपाधीसमेत जितिन् । मिस नेपालगन्ज दीपिकालाई गोर्खा एयरलाइन्सले आफ्नो कम्पनीको तर्फबाट एयर होस्टेजको जागिरसमेत पक्का गरिदिएको छ । उनलाई त्यसका लागि साहारा इन्टरनेशनल एयर होस्टेज एकेडेमीले निशुल्क एयर होस्टेसको तालिमको समेत व्यवस्था गरिसकेको छ । यो उपाधि र अवसरसँगै उनले आयोजक एक्स जेनेरेशनको तर्फबाट १५ हजार रुपैयाँ र यति सिमेन्टको तर्फबाट १० हजार रुपैयाँ नगद पुरस्कारसमेत हात पारिन् ।

यसैगरी फस्ट रनरअपको उपाधि नर्सिङकी विद्यार्थी समीक्षा बोहराले हात पारिन् । योसँग उनी मिस फोटोजेनिक पनि घोषित भइन् । १० हजार नगदसँगै उनले म्यूजिक भिडियोमा समेत मोडलिङको अवसर पाउनेछिन् । त्यस्तै सेकेन्ड रनरअप सिर्जना थपलिया भइन् । त्यस्तै आयुष्मा शर्माले मिस डिसीप्लिनको उपाधि हात पारिन् । सिर्जना सिंह ठकुरीले मिस क्याटवाकको उपाधि पाइन ।

त्यसैगरी कोरियो ग्राफर च्वाइस्मा कोपिला पाण्डे परिन् भने कल्पना बोगटी मिस पर्सनालिटी घोषित भइन् । आयोजक एक्स जेनरेशनका अध्यक्ष संयोज जंग शाहले विभिन्न आरोह अवरोध पार गर्दै मिस नेपालगन्ज चौथो संस्करणसम्म पुगेको र अझैँ परिस्कृत गर्दै लैजाने बताए । मिस नेपालगन्जका निर्णायकहरुमा मोडेल रिजु श्रेष्ठ, विबेक खतिवडा, फोटोग्राफर तथा व्यवसायी विनोद अग्रहरी तथा पत्रकार प्रभात देवकोटा थिए ।