शान्ति ठटाल पाँचौंपटक पलेँटीमा

अन्नपूर्ण : नेपालयको आयोजनामा अंग्रेजी महिनाको अन्तिम शुक्रबार हुँदै आएको सांगीतिक शृंखला पलेँटीमा गायिका शान्ति ठटाल पाँचौंपटक प्रस्तुत हुँदैछिन् । असार १६ गते नेपालयको आरशालामा ठटाल विगतमा झैं यसपटक पनि आफ्ना चर्चित गीतका साथ प्रस्तुतिको तयारीमा छिन् ।

ठटाल यसपटक संगीतकारका रूपमा उपस्थित हुनेछिन् । रवीन्द्र भारती विश्वविद्यालयबाट औपचारिक संगीत शिक्षा प्राप्त ठटालका संगीतलाई लामो समयदेखि पलेँटी शृंखलामा आबद्ध गायिका मीना निरौला र दार्जिलिङबाट शान्ति ठटालकै साथमा आएकी गायिका सोनू राईले प्रस्तुत गर्नेछन् । पलेँटीमा दिनेश रेग्मीले किबोर्ड, बुद्ध लामाले बाँसुरी, सुन्दर महर्जनले पर्कसन, सन्देश महर्जनले तबला र सुरजकुमार प्रधानले गितार बजाएर गायिकाहरूलाई सघाउनेछन् ।

सन् २००६ मार्च ३१ मा आयोजित पलेँटीमा ठटाल ६६ वर्षको उमेरमा जीवनकै पहिलोपटक एकल कार्यक्रममा प्रस्तुत भएकी थिइन् । त्यसैगरी सन् २००८ सेप्टेम्बर २६ मा दोस्रोपटक, सन् २०१२ अगस्ट ११ मा पलेँटी उत्सवका क्रममा तेस्रोपटक र सोही महिनाको ३१ तारिखमा पलेँटीको नियमित शृंखलामा चौथोपटक प्रस्तुत भएकी थिइन् । पछिल्लो समय पुन पलेँटीमा निम्तो पाउँदा आफूलाई गौरव लागेको उनको भनाइ छ । 'फेरि आफूलाई प्रस्तुत गर्न नेपाल आउन पाएकामा मलाई गर्व महसुस भइरहेको छ', अग्रज गायिका ठटाल भन्छिन्, 'निकैअघि चुँडिएको नेपाल र दार्जिलिङबीचको सांगीतिक सेतुलाई पलेँटीले फेरि जोड्ने काम गरेको देख्दा खुसी लागिरहेको छ ।'

सिक्किमको सांस्कृतिक विभागमा लामो समय संगीतको नेतृत्व गरेकी शान्ति ठटाल पछिल्लो समय दार्जिलिङमा बसोबास गर्छिन् । चलचित्र 'परालको आगो' र 'बाँच्न चाहनेहरू'मा संगीत गरेर ठटाल नेपाली भाषामा बनेका चलचित्रमा संगीत भर्ने पहिलो महिला संगीतकारका रूपमा दरिएकी छन् । ठटालले महाकवि लक्ष्मीप्रसाद देवकोटाका कृतिहरू मुनामदन, कुञ्जिनी र म्हेन्दोमा आधारित सांगीतिक सिर्जना पनि गरेकी छन् । मुनामदनमा संगीत भर्ने काम सन् १९७७ तिर भएको थियो । तर, त्यसको रेकर्ड आफूसँग नभएको र धुन पनि बिर्सेको उनी बताउँछिन् । यसपटकको पलेँटीमा त्यो संगीत फेरि ल्याउने प्रयास उनले गरिरहेकी छन् ।