काठमाडौ : नेपाल बिद्युत प्राधिकरणका कार्यकारी निर्देशन कुलमान घिसिङले सुदुरपश्चिममा ट्रान्समिसन र ट्रान्सफर्मरको समस्या चार दिन भित्र समाधान गरेर लोडसेडिङ अन्त्य गर्ने घोषणा गर्नु भएको छ । पूर्व प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डसँग शनिवार लाजिम्पाटमा भएको भेटमा घिसिङले त्यस्तो घोषणा गर्नु भएको हो ।
घिसिङले तीन–चार दिनभित्रै प्रविधिमा सुधार गरी सुदुरपश्चिमको लोडसेडिङ अन्त्य गर्ने प्रतिवद्धता जाहेर गर्नुभएको प्रचण्डको नीजि सचिवालयले जनाएको छ ।
धनगढीबाट काठमाडौं आउनुभएका अध्यक्ष प्रचण्डले घिसिङलाई आफू काठमाडौं आइपुग्दा लाजिम्पाट आउन आग्रह गर्नु भएको थियो । काठमाडौं आएलगत्तै शनिबार बिहान अध्यक्ष प्रचण्डले कार्यकारी निर्देशक घिसिङसँग सुदुरपश्चिममा लोडसेडिङको समस्या कम नभएको जानकारी गराउँदै तुरुन्त लोडसेडिङ अन्त्य गर्न आग्रह गर्नुभएको थियो ।
चुनावी अभियानका क्रममा तीन दिनअघि सुदुरपश्चिम पुग्नुभएका अध्यक्ष प्रचण्डलाई कञ्चनपुरका स्थानीय जनताले देशका अधिकांश ठाउँमा लोडसेडिङ हटेपनि सुदुरपश्चिममा लोडसेडिङ अन्त्य नभएको गुनासो गरेका थिए । स्थानीय जनताको गुनासो सुनेपछि अध्यक्ष प्रचण्डले सार्वजनिक मञ्चबाटै काठमाडौं फर्केलगत्तै सुदुरपश्चिमको लोडसेडिङ अन्त्य गर्न विशेष पहल गर्ने घोषणा गर्नुभएको थियो ।
प्रतिक्रिया दिनुहोस !
