काठमाडौं : बेलायतका चर्चित गायक जे सनको काठमाडौंमा एकल कन्सर्ट हुने भएको छ । काठमाडौंको दरबारमार्गस्थित ‘डेजा भु' क्लबमा असार २८ गते बेलुकी ७ बजेबाट सुरु हुने कन्सर्ट नेपाली डीजे सेसनसहित चार घन्टा चल्नेछ । कन्सर्टमा जे सनले राइड इट, मेक माई लभ, स्टोलन, डाउन डाउन, आई एम अल योर्स, लाइक दिस लाइक द्याट, डान्स विद यु, ह्वेर यु डु गोलगायत विश्वचर्चित गीत प्रस्तुत गर्नेछन् ।
युहान इन्टरनेसनल इभेन्टस्को आयोजनामा हुने कार्यक्रमका बारेमा बुधबार काठमाडौंको होटल सोल्टीमा आयोजित पत्रकार सम्मेलनमा यससम्बन्धी जानकारी दिइएको हो । पत्रकार सम्मेलनमा कन्सर्टको सम्पूर्ण तयारी पूरा भएको जानकारी दिइयो ।
आयोजकले ‘ब्लाक रिलिजन' सांगीतिक शृंखलाअन्तर्गत पहिलो शृंखलामा जे सनलाई काठमाडौंमा प्रस्तुत गर्न लागेको युहानका प्रबन्ध निर्देशक सानु खानले बताए । ‘नेपालका जे सनका फ्यान प्रशस्त भएकाले उनको एकल कन्सर्ट राखिएको हो', उनले भने । जे सन आफ्नो टिमसहित असार २७ गते काठमाडौं अवतरण गर्नेछन् । अमेरिकाको न्युयोर्क बस्दै आएका उनी अमेरिकाबाट सोझै नेपाल आउन लागेका हुन् ।
कन्सर्टमा करिब ६ हजार दर्शक सहभागी हुने कन्सर्टका मार्केटिङ डिरेक्टर मन्चिन शाक्यले जानकारी दिए । २५ सय, तीन हजार र पाँच हजार रुपैयाँको टिकट तोकिएको कन्सर्टमा टिकटअनुसारको सुविधा दर्शकले पाउनेछन् । बजाज मोटरसाइकलकी बजार प्रमुख पुनम सिंहले नेपालमा जे सनका फ्यान प्रशस्त भएकाले उनको कन्सर्ट आयोजना हुनु खुसीको कुरा भएको बताइन् ।
‘ब्रिटिस आर एन्ड बी' गायक जेसन सन् २००९ देखि सन् २०१२ सम्म लगातार चार वर्ष बेलायतमा पहिलो नम्बरमा रहे । उनले सन् २००८, २००९ र २०११ गरी तीन पटकसम्म बेलायतकै उत्कृष्ट बीएमआई सङ साइटर अवार्डसमेत जितेका छन् । अमेरिकामा समेत दुई पटकसम्म उत्कृष्ट १० गायकभित्र पर्न सफल उनलाई सामाजिक सञ्जाल फेसबुकमा ७० लाख र ट्विटरमा ४० लाखभन्दा बढीले पछ्याइरहेका छन् ।
प्रतिक्रिया दिनुहोस !
