कलाकारितामा धैर्यता चाहिन्छ :देविका केसी

नेपाली नारीको महान् चाड तीजलाई लक्षित गरेर सांगीतिक बजारमा एकपछि अर्को गीत आउने क्रम बढेको छ । यस्तैमा लोकगायिका देविका केसी गुरुङले पनि ‘नैना र रेशम', ‘पारिको संगीले'जस्ता नयाँ तीज गीत बजारमा ल्याएकी छन् । नेपाली लोक पारामा तामाझ प्रस्तुत हुने गायिका देविकाले करिब दुई दर्जन एल्बम र दुई सयभन्दा बढी फुटकर गीतमा स्वर दिइसकेकी छन् । गायिका देविकासँग अन्नपूर्णका लागि शिवराज योगीले गरेको संवाद :

 आफूलाई को भनेर चिनाउन चाहनुहुन्छ ?
म लोकदोहोरी गायिका नै भनेर चिनिन चाहन्छु, हुन त म सबै खाले गीत गाउने कोसिस गर्छु, कहिलेकाहीँ मोडलिङ पनि गरेकी छु ।

कति पढ्नुभएको छ ?
संस्कृतबाट मास्टर्स गर्दैछु ।

 सानो हुँदा के बन्छु जस्तो लाग्थ्यो ?
म सानैदेखि पढाइबाहेक गीत गाउने, गजल लेख्ने गथेँ । म गायिका नभएको भए शिक्षिका पक्कै हुन्थेँ । किनकि त्यसमा पनि मेरो रुचि थियो ।

कलाकारितामा लाग्ने प्रेरणाबारे भनिदिनुस् न ?
केही बन्छु भन्दा पनि केही बन्ने लक्षण पहिले नै देखिँदो रहेछ, जब म बुझ्ने भएँ तबदेखि आफैं मादल बजाएर गाउने, नाच्ने गर्थें । यो कला ममा थियो । त्यो कलाले मूर्त रूप भने कलेज पढ्न थालेपछि पायो । मेरो प्रेरणाको स्रोत नै मेरो बाबा हुनुहुन्थ्यो ।

कलाकारिता नै रोज्नुपर्ने कारण ?
म भित्रको थोरबहुत कलाले नै मलाई यस क्षेत्रमा लाग्ने उत्साह मिलेको हो । धेरैसँग क्षमता हुँदा पनि आफ्नो खुबी देखाउने स्थान नपाएर त्यसै बसेको पाइन्छ । यस अर्थमा म भाग्यमानी पनि हुँ । जति बेला म यो क्षेत्रमा संघर्ष गर्दै थिएँ त्यति बेला लोकसंगीतले फराकिलो बजार बनाइसकेको थियो । धेरै सिक्ने, यही क्षेत्रमा लागेर बाँच्ने र राजधानीमा बसेर पढ्न सक्ने भएँ ।

 कलाकार हुँदाका फाइदा बेफाइदा के हुन् ?
देशको गीत गाएर नेपाली जनमानसमा चिनारी दिन सजिलो हुँदो रहेछ । म अहिले यही क्षेत्रमा लागेर देशविदेश घुमेर, गीत गाएर निर्धक्क बाँचेकी छु । बेफाइदा खासै देख्दिनँ । तर, बिनासंघर्ष र लगनशीलता छैन भने यो क्षेत्रमा टिक्न र बाँच्न गाह्रो छ । सानातिना नराम्रा पक्ष त सबै क्षेत्रमा हुन्छन् नै ।

आजसम्म कति गीत गाउन भ्याउनुभयो ?
दुई दर्जनजति एल्बम नै निकालेँ । मेरो आवाजमा रेकर्ड गीतको संख्या त दुई सयभन्दा बढी पुगिसके ।

 तपाईंको विधा कुन हो ?
मेरो विधा लोक नै हो ।

 कलाकार बनेर जीविका चलाउन सकिन्छ त ?
आजसम्म त जीविका चलेकै छ । भविष्य के होला भन्न सक्दिनँ, किनकि अहिले गायकगायिकाको आयस्रोत नै स्टेज प्रोेग्राम मात्र बन्न पुगेको छ । तैपनि मेरो लक्ष्य यही क्षेत्रमा भविष्य खोज्ने हो ।

 नेपालको कलाकारिता कुन यात्रामा छ जस्तो लाग्छ ?
पहिला जस्तो सीमित बाटो र गोरेटोमा मात्र अब नेपाली कलाकारिता छैन । धेरै फराकिलो र फड्को मारिसकेको अवस्थामा नेपाली कलाकारिता छ । नयाँ पुस्ताले पुरानो पुस्तालाई सम्मान गर्दै भड्किलो पाराबाट जोगिन भने आवश्यक छ ।

गायिका आफैं मोडलिङ गर्ने चलन बढेको छ नि ? तपाईं पनि गर्नुहुन्छ ?
हल्का डान्स गर्छु । त्यसैले मोडलिङ पनि गरेको छु । केही आफ्ना र केही साथीभाइको गीतमा गरेकी छु ।

 के चाहिँदो रहेछ कलाकार बन्न ?
पहिला आफूमा कला, क्षमता र लगनशीलता चाहियो । यस क्षेत्रमा लागिसकेपछि धैर्यको निकै खाँचो छ ।

 जिन्दगी के हो जस्तो लाग्छ ?
जिन्दगी सुन्दर फूल हो; सर्छ, झाँगिन्छ, फुल्छ, ओइलिन्छ, झर्छ । संघर्ष, सुख, दुःख हाँसो, रोदनको सम्मि श्रण हो सायद जिन्दगी ।

 प्रेम के हो जस्तो लाग्छ ?
प्रेम हरेक किसिमको हुन्छ, माया प्रेमबिना हरेक कुरा असफल छन्, एकअर्काको प्रेमबिना सृष्टि अधुरो रहला । जस्तो कि मेरी आमाको प्रेमबिना म हुर्किन सक्दिनथेँ...।

 प्रेममा पर्नुभयो कि भएन ?
प्रेममा खासै परिएन भन्दा हुन्छ । सानैदेखि आफूले नै आफ्ना लागि खट्नु पर्‍यो । परिवारको जिम्मेवारीबोध गर्नु परेकाले म बढी करिअरमै केन्द्रित हुनु पर्‍यो।

 प्रेम र सेक्सको सम्बन्धबारे के भन्नुहुन्छ ?
सेक्स नारी पुरुषबीचको अगाध सम्बन्ध हो कि ! जसबिना सृष्टि रोकिन्छ ।