काठमाडौं : चलचित्र ‘प्रेमगीत २’को प्रदर्शन मिति नजिकिँदै गर्दा अभिनेत्री अश्लेषा ठकुरीको चर्चा बढ्दै गएको छ। अश्लेषा मुख्य अभिनेत्री भएको चलचित्र शुक्रबारबाट एकसाथ देशभर प्रदर्शनमा आउँदैछ।
अश्लेषाले यसै चलचित्रबाट अभिनयमा डेब्यु गरेकी हुन्। डेब्यु चलचित्रबाटै उनले सोचेभन्दा राम्रो चर्चा पाएकी छन्। भनिन्, ‘चलचित्रबाट यति धेरै चर्चा पाइन्छ भन्ने सोचेकी पनि थिइनँ, अन्य कलाकारले धेरै चलचित्रबाट पनि नपाउने चर्चा मैले पहिलो चलचित्रबाट पाएँ।’
रंगकर्मीद्वय सुनील पोखरेल र वीरेन्द्र हमालको विद्यार्थी उनी चलचित्रले प्रचारप्रसारका लागि देशभर आयोजना गरेको कन्सर्टमा समेत सहभागी भएकी थिइन्। सो कन्सर्टमा उनी र चलचित्र भित्रको उनको जोडी प्रदीप खड्कालाई हेर्न दर्शकको भीड देखियो। कन्सर्टमा केही नृत्यका प्रस्तुतिसमेत उनले दिएकी थिइन्। उनले चलचित्र प्रदर्शनपछि आफ्नो अभिनय करिअरले अझ उचाइ लिने विश्वास व्यक्त गरिन्।
‘प्रेम गीत २’ निर्माता सन्तोष सेनले बनाएका हुन्। सेनले यसअगाडि केही चलचित्र निर्माण गरिसकेका छन्। चलचित्रबाट सन्तोष पनि अभिनयमा देखिँदैछन्। प्रेमकथामा बनेको यो चलचित्र वर्ष २०७४ को प्रतीक्षित चलचित्र पनि हो।
रामशरण पाठकको लेखन निर्देशन रहेको चलचित्रभित्र प्रेम, भ्रमण र बदलासमेत रहेको बताइएको छ। कल्याण सिंह, अलिस कार्की र रोहित जोन क्षेत्रीको संगीत रहेको चलचित्रमा प्रदीप र अश्लेषाका अलावा कैलाश कटुवाल, कविता रेग्मी, शिशिर भण्डारी, कुमार कार्की, श्रद्धा प्रसाईलगायत कलाकारको अभिनय छ।
प्रतिक्रिया दिनुहोस !
