रेखालाई तेस्रोलिंगीको आशीर्वाद !
काठमाडौं : चर्चित नायिका रेखा थापाले आफूलाई तेस्रोलिंगीको आशीर्वाद रहेको बताएकी छन् । उनले बिहीबार मध्याह्न ठमेल सातघुम्ती चोकमा तेस्रोलिंगी महिला मेघना लामाले सुरु गरेको ‘पिंक टिफानी पब एन्ड रेस्टुरेन्ट’मा बोल्दै गर्दा त्यसो भनेकी हुन् । नायिका थापाले भनिन्, ‘मलाई तेस्रोलिंगीहरूले आशीर्वाद दिएका छन् ।’ रेस्टुरेन्टको उद्घाटनका क्रममा प्रमुख अतिथिका रूपमा पुगेकी रेखाले रिबन काट्दै तेस्रोलिंगी महिलाले चलाएको रेस्टुरेन्टको सफलताको कामना गरिन् ।
‘मैले पहिलेदेखि नै तेस्रोलिंगीहरूलाई समर्थन गर्दै आएकी छु । म उनीहरूलाई तेस्रोलिंगीभन्दा पनि एउटा ‘ह्युमन विइगं’ को रूपमा हेर्छु’, रेखाले अन्नपूर्णसँगको कुराकानीमा भनिन्, ‘हुन त तेस्रोलिंगीलाई हेर्ने सबैको दृष्टिकोण फरक हुन्छ । तर म सम्मान गर्छु ।’ उनले फिल्म लाइनमा आफ्ना धेरै तेस्रोलिंगी साथीहरू रहेको पनि जानकारी दिइन् ।
विशेषगरी टेक्निकल पार्टमा धेरै तेस्रोलिंगीहरू काम गर्ने गरेको उनले बताइन् । आफ्नो चलचित्रमा उनले हेयर ड्रेसर, डान्सरको रूपमा तेस्रोलिंगीलाई अवसर दिएको बताइन् । भनिन्, ‘तेस्रोलिंगीहरू जन्मँदा नै अरूभन्दा प्रतिभावान् भएर जन्मिएका हुन्छन् ।’ विभिन्न विधामा उनीहरूले आफ्नो प्रतिभा देखाइरहेका छन् । मोडलिंग, व्यापार व्यवसायमा राम्रो करिअर बनाउँदै आएका छन् । मेघनाले पनि
यति ठूलो व्यवसाय सुरु गर्नु भनेको सकारात्मक कुरा भएको रेखाको भनाइ छ ।
समाजमा स्थिरता नभएको र आलोचना गर्न मान्छे स्टान्डवाई बसेको रेखाको दुःखेसो छ । उनले भनिन्, ‘तेस्रोलिंगी भन्नेबित्तिकै नराम्रो काम गर्नु भन्ने छ ? तर समाजले हामीलाई बनाउनेभन्दा पनि हामीले समाज बनाउनुपर्छ । समाजले के भन्छ त्यसको ठेक्का लिनु हुँदैन ।’ तेस्रोलिंगीमा जस्तै कलाकारहरूले पनि अनेक आरोप खेप्नु परेको उनले बताइन् ।
‘तेस्रोलिंगी साथीहरूले भगवानले ठग्यो, यस्तो रूप बनाइदियो भन्दै गुनासो गर्छन् तर यो कुरा बनाएर बनिने कुरा हैन, जे छ त्यसैमा गर्व गर्नुपर्छ’, रेखाले भनिन्, ‘जो आफ्नो पहिचान लुकाउँदैन त्यो मान्छे साँच्चै साहसी हो । नत्र तड्पिएर बाँच्नुमा पीडा हुन्छ । पहिचान खुलाएर आफू स्वावलम्बी हुनु र अरूलाई पनि रोजगारी दिनु मेघनाको प्रशंसनीय पाटो हो ।’ उनले धेरै वर्षदेखि तेस्रोलिंगी सँग काम गरेको खुलाइन् । उनीहरूलाई अगाडि ल्याउन चाहेको पनि बताइन् ।
सामान्यतया हलिउड, बलिउडमा पनि हिरोहिरोइन र तेस्रोलिंगीहरूको सम्बन्ध नजिकको हुने गरेको रेखाको भनाइ छ । कामको सिलसिलामा उनीहरूसँग बस्नुपर्ने स्थिति आउने पनि उनले खुलाइन् । ‘एकजना तेस्रोलिंगी हेयर ड्रेसरसँग मलाई सुती भन्ने आरोप पनि लगाए’, उनले भनिन्, ‘समाजले आक्षेप लगाउन छोड्दैन । तर म उनीहरूलाई सम्मान गर्छु उनीहरू मेरो मार्गनिर्देशक हुन्, मलाई यो लगाऊ, त्यो नलगाऊ भनेर सुझाव दिइरहेका हुन्छन् ।’
मेघना नेपालको पहिलो तेस्रोलिंगी व्यवसायी हुन् । उनले दुई वर्ष पहिला वसन्तपुरमा पिंक टिफानी नामको रेस्टुरेन्ट सुरु गरेको थिइन् । त्यसैको अनुभव र सफलतापछि ठमेलमा पनि रेस्टुरेन्ट सञ्चालन गर्ने आँट आएको उनले बताइन् । दीपक रेग्मी र उनले मिलेर यो रेस्टुरेन्टको सुरुवात गरेकी हुन् । उनको रेस्टुरेन्ट उद्घाटनमा उनका बुवाआमा र आफन्तहरूको उपस्थिति थियो । मेघनाका अभिभावक उनको प्रगति देखेर खुसी छन् । मेघना तेस्रोलिंगीहरूलाई हेरिने दृष्टिकोणमा परिवर्तन ल्याउन र रोलमोडल बन्न व्यवसाय सुरु गरेको बताउँछिन् ।
प्रतिक्रिया दिनुहोस !
