बाढीले पुलको पिलर भासियो

गाईघाट : लगातारको वर्षाका कारण उदयपुरको सदरमुकाम गाईघाट आउने गाईघाट-कदमाहा सडक खण्डको त्रियुगा नगरपालिका ६ स्थित जलजले खोलाको पक्की पुल भासिएको छ ।भारी वर्षाका कारण पिलरको जगको माटो बगेपछि पुल भासिन पुगेको हो । बाढीले पिलरको माटो खोतल्दै गएपछि पूर्वपट्टिको बिम पनि चर्किन पुगेको स्थानीयको भनाई छ । ३ स्पानको उक्त पुलको पूर्वपटिको पिलरको जगको माटो बाढीले बगाएर पुल भासिदै गएपछि बगाउने खतरा बढेको हो ।

पिलर भासिएसँगै स्थानीय प्रशासनले पुलमाथिबाट सवारी साधन हिडाँउन रोक लगाएको छ । सवारी साधन रोकिएपछि सदरमुकाम आउजाउमा समस्या उत्पन्न भएको स्थानीयको भनाई छ । बर्षा नरोकिएपछि जलजले खोला वारपार गर्न नसक्दा सदरमुकाम आउन समस्या भएको स्थानीय मानबहादुर राउतले बताए ।

खहरेखोला भएपनि लगातारको बर्षाका कारण बाढी आएकाले सवारी साधन तथा स्थानीयबासी आवतजावतमा समस्या भएको उनको भनाई छ । पानी पर्नासाथ बाढी आउने गरेको उक्त खोला तर्न पानी रोकिएपछि झण्डै १ घण्टा कुर्नुपर्ने बाध्यता रहेको स्थानीयको भनाई छ ।

बाढीले पुललाई सपोर्ट गर्न बाँधिएको बाँधको स्पर पनि भत्किएका छन् । बाढीको मूल धार पिलरमा ठोक्किन जाँदा बाढीको पिलर भासिन पुगेको हो । उक्त पुल उदयपुर सदरमुकामलाई सिराहा, सप्तरी हुँदै देशका मुख्य भागसँग जोड्ने प्रमुख माध्यम हो ।

२० वर्षअघि जापान सरकारले उदयपुर सिमेन्ट उद्योगको स्थापना गरिदिएपछि सदरमुकाममा पहिलोपटक सडक सञ्जाल जोडिने क्रममा सो पुल निर्माण भएको थियो । १६ वर्षअघि निर्मित पुल सडक डिभिजन कार्यालय लाहान अन्तरगत निर्माण भएको हो ।

पुरानो हुँदै गएको र बाढीले निरन्तर माटो बगाउँदै गएकाले पुल भत्कने खतराबारे स्थानीयले सडक डिभिजन कर्यालय लाहानलाई जानकारी गराएका थिए । जानकारीसँगै सडक कार्यालय गाईघाटले लाहान डिभिजन सडकसँगको सहकार्यमा पुलको तत्काल मर्मत गर्ने तयारी थालेको छ ।

बर्षेनी खोलाले पिलरको माटोको भाग कटान गर्दै गएको सडक कार्यालयलाई जानकारी गराएपनि कार्यालयले त्यति वास्ता नगरेको स्थानीय कृष्ण पराजुलीले बताए । गाईघाटस्थित सडक कार्यालयका ईन्जिनियर कमलप्रसाद साहले भासिन लागेको पुलको पिलरवरिपरि जालीमा ढुंगा र बालुवाको बोरा भरेर पिल्लरको सुरक्षा गर्ने तयारी गरिएको बताए । उनले दुईतीन दिनभित्र पुल मर्मत गरिसकेर यातायात सुचारु गराउनेगरी लाहान सडक डिभिजनको प्राविधिक टोली परिचालन भइसकेको इन्जिनियर साहले बताए ।